Recent Posts

Breaking News

167 ka pamilya nakadawat og hinabang gikan ni Kong. Frasco


Dul-an 200 ka pamilya nga nagpuyo sa barangay Maslog, Danao City ang nabiktima sa baha tungod sa sunod-sunod nga pag-uwan sa niaging adlaw.

Tungod niini, nakahukom si Rep. Vincent “Duke” Frasco pag-celebrar sa iyang adlawng natawhan niadtong Oct. 27 pinaagi sa pag-apod apod ug hinabang sa mga pamilya. Lima ka libo o P5,000 ang hinabang nga nadawat sa matag usa sa 167 ka pamilya nga nawagtangan sa ilang kabutangan ug naguba ang panimalay tungod sa baha.

“Dili lalim ang ilang naagian. Ang kahadlok ug kahingawa sa ilang kinabuhi ug kabtangan, ang pagkaguba sa ilang gipuy-an, dili sayon. Mao nga I chose to spend my birthday with them aron pagpakita ug suporta ug paghatag ug hinabang,” matod pa ni Kongresman Frasco.

Mapasalamaton ang mga biktima sa baha sa ilang pagdawat sa cash assistance, kay kini daku na kaayong tabang sa ilang pagbangon.

“Sa ilang kasubo, ania ang atong opisina andam motabang aron makabarog sila pagbalik,” nagkanayon ang kongresman.

Sa laing bahin, gisubhan usab ni Frasco sa niaging mga adlaw ang bag-ong sementado nga dalan sa barangay Dunggoan, Danao City nga nibalor ug P13 milyones. Ang budget sa maong proyekto nalakip sa 2020 national budget ug

gi-implementar sa Department of Public Works and Highways.

“Nagpasalamat ko sa katawhan sa ilang pagpili kanako, kay nahatagan kog oportunidad nga mapasemento kining dan nga dugay na nilang gihandom,” matod pa ni Frasco. / PR


Source: Sun.Star Superbalita (https://www.sunstar.com.ph/article/1875257/Superbalita-Cebu/Balita/167-ka-pamilya-nakadawat-og-hinabang-gikan-ni-Kong-Frasco?ref=rss&format=simple&link=link)

No comments