Recent Posts

Breaking News

1 sa 3 ka pugante napatay sa Mabolo police


Napatay sa mga pulis ang usa sa tulo ka mga piniriso nga mieskapo sa bilanggoan sa Mabolo police station sa Cebu City Police Office (CCPO) pasado alas 10 sa buntag sa Lunes, Oktubre 26,2020 sa sitio San Vicente, Cabantan Street, Barangay Luz, siyudad sa Sugbo.

Ang napatay mao si Roberto Cadu Ludong, walay permanenting address, nag-atubang og kaso sa pagpayuhot sa illegal nga drugas.

Matod ni Police Major Dindo Alaras, hepe sa Mabolo Police Station, nga human mieskapo ang tulo nila ka mga binilanggo alas 12 sa tungang gabii sa Oktubre 26, milusad dayon silag manhunt operation.

Nianang pagkabuntag, adunay tawag sa telepono nga nadawat ang Mabolo police nga nasigpatan ang mga pugante sa Cabantan nga naglataylatay sa mga atop sa kabalayan.

Ila kining giadto aron panakpon. Apan sa dihang pa-surrenderon, giingong miaksyon og pusil si Ludong sa mga pulis hinungdan nga giunhan sa pagpusil.

Wa pa matino diin siya og armas.

Patay diha-diha si Ludong samtang nadakpan ang kauban niini nga si Oliver Basak samtang nakaipsot si Nico Baylosis.(AYB)


Source: Sun.Star Superbalita (https://www.sunstar.com.ph/article/1874710/Superbalita-Cebu/Balita/1-sa-3-ka-pugante-napatay-sa-Mabolo-police?ref=rss&format=simple&link=link)

No comments