Recent Posts

Breaking News

1 positibo sa 762 ka vendors sa Lapu-Lapu nga gi-swab test


USA pa lang ka vendor sa dakbayan sa Lapu-Lapu ang nagpositibo sa coronavirus disease 2019 (Covid-19) sa gipahigayong swab test sa kagamhanan niadtong Oktubre 19 hangtod sa 21.

Ang nagpositibo sa test lakip sa 762 ka vendors nga napaubos sa swab test niadtong Oktubre 19, sumala sa epidemiological and surveillance unit officer sa Lapu-Lapu nga si Grace Mary Carungay.

Padayon pa hinuong gihuwat sa pagkakaron ang resulta sa swab test niadtong Oktibre 20 ug 21. Sa kinatibuk-an, niabot sa 3,000 ka vendors ang napaubos sa swab sa kagamhanan.

Nilapas kini sa target unta nga 2,500.

Gani sa katapusang adlaw sa swab test niadtong Oktubre 21, sayong wala na manawat ang City Health Office og vendors nga magpa-swab sanglit moabot na sa usa libo ang midagsa sa Hoops Dome sa Barangay Gun-ob, alas 10 pa lang sa buntag.

Tungod niini,gibutyag ni Carungay nga aduna pay vendors nga wala mapaubos sa swab test gumikan kay sobra na sa ilang target ang mipatim-aw.

Usa hinungdan niini mao ang pagpa-swab sa mga naninda lang ug ginagmay sa mga satellite market sa kabarangayan, sumala ni Carungay.

Aron mapaubos sa swab ang tanan hayan posibleng mopahigayon sila ug laing testing sa mosunod mga adlaw.

“Sa usa ka tindahan man gud tanan nagpa swab unya dili lang usa ka tindero or tindero naay tagurha tag tulo tag upat o sobra pa,” matod ni Carungay.

Niadtong Oktubre 22 dul-an 200 ka mga drayber usab sa isla sa Olango ang gipaubos sa swab test. Ang maong kalihukan subay gihapon sa pagpakita sa kagamhanan sa mga dumuduong nga Covid-free ang mopadangat sa ilang serbisyo ug negosyo nunot sa pagbukas na sa tursimo sa dakbayan. (GCM)


Source: Sun.Star Superbalita (https://www.sunstar.com.ph/article/1874339/Superbalita-Cebu/Balita/1-positibo-sa-762-ka-vendors-sa-Lapu-Lapu-nga-gi-swab-test?ref=rss&format=simple&link=link)

No comments