Recent Posts

Breaking News

Sugalan gironda, brgy. tanod sikop


DIHANG kalit niabot ang kapulisan, nabungkag ug nagkaguliyang ang sugalan. Nikaratil og dagan ang mga sugarol apan ang pipila kanila nasignit sa awtoridad lakip sa usa ka barangay tanod nga nasakpan sa akto nga nagmasyador sa tigbakay.

Kini ang paghulagway sa kapulisan sa sugalan sama sa hantak, tigbakay ug uban sa pa sa Sitio Ipil-ipil, Barangay Estaca, lungsod sa Compostela, Dominggo sa alas 12:15 sa udto, Septiyembre 13.

Si Captain Vincent Zozobrado, hepe sa Compostela Police Station nga nahinabi sa Superbalita Cebu, nagkanayon nga ang mga dinakpan relaxed ra kaayo samtang nagtigbakay dihang naabot sila, nasurprisa ug wala makadagan.

Matod ni Zozobrado, nakadawat sila og tawag gikan sa nagpakabanang residente nga pwerting kusoga sa sugal sa saltada sa tigbakay sa maong dapit.

Ang nasikop mao sila si Arnel Ganar, 36, ulitawo ug barangay tanod sa Estaca ug giingong nagpasiugda sa sugal sa dapit, sumala sa kapulisan.

Ubang nasignot sa kapulisan mao sila si Francisco Watimar, 25, ulitawo; James Ganar, 32; Alexander Yungco, 51, minyo; Marx Pastor Ango, 45; Jigger Tundag, 41; Jake PateƱo, 19; ug Dexter Capangpangan, 45.

Nadakpan sa hantak mao sila si Arnel Donaire, 24; Ronober Ruta, 32 ug Pejee Durano 19.

Wa sila maglangay ilang naabtan ang daghang mga drayber sa habalhabal ug mga estambay nga nagmasada sa ilang mga manok.

“Nasurprisa sab mi Sir kay usa sa among nadakpan barangay tanod sa maong dapit, unya ang roydahan diha sa tungod sa iyang panimalay,” dugang ni Zozobrado.

Sumala pa niini nga ang Tanod nga si Arnel Ganar, mihimakak nga siya ang nagpasiugda sa tigbakay.

Mirason nga iyaha pa gani nga gibadlong ang iyang mga silingan nga undangon.

Apan si Zozobrado miingon nga wala sila motuo sa pangangkon sa tanod, sanglit nakit-an gyud nila nga niapil kini sa pagmasyada.

Gitug-an niini nga sa miaging mga adlaw, duna sab silay nadawat nga report kabahin gihapon sa maong tigbakayan sa maong dapit.

Si Zozobrado mibutyag nga milambo ang maong tigbakayan, gumikan sa pagkakunsintidor ug pagkaprotektor sa maong brgy. tanod.

Nasakmit sa kapulisan ang 4 ka manok inugtatari, 2 ka buwang, pusta nga P1,400.

Sa pagka-alas 2:55 sa hapon sa samang adlaw, tulo ka mga sugarol sa tigbakayan, nasikop sab sa Purok Mangga Brgy. Estaca.

Nasikop sila si Jesus Tan Naya, 45; Ildebrando Noval, 53; og Arnel Danlag, 42. Narekuber sa kapulisan ang lima ka manok inugtatari, 2 ka buwang ug pusta nga P1,500.

Ang lalawigan ubos na sa modified general community quarantine (MGCQ) apan gidili gihapon ang panagtapok labina sa sugal.


Source: Sun.Star Superbalita (https://www.sunstar.com.ph/article/1870111/Superbalita-Cebu/Balita/Sugalan-gironda-brgy-tanod-sikop?ref=rss&format=simple&link=link)

No comments