Recent Posts

Breaking News

Sagunsong tay-og way damyos


DAVAO OCCIDENTAL -- Gibutyag sa Provincial Disaster Risk Reduction and Management Office (PDRRMO) nga wa makatala og damyos ang makusog ug sunod-sunod nga linog niadtong Miyerkules, Septyembre 9.

Ang sunod-sunod nga pagtay-og nahitabo tulo ka adlaw human unang nahitabo ang magnitude 6.4 nga linog niadtong Septyembre 6.

Giklaro ni Harry Chester Firman Camoro, PDRRMO action officer, nga way natalang naangol ug nadamyos sa mga nahitabong pagtay-og nga nasinati sa lima ka munisipyo sa probinsiya.

Sa abiso sa Philippine Institute of Volcanology and Seismology (Phivolcs), nasayran nga nahitabo ang unang pagtay-og nga magnitude 5.5 mga 268 kilometros, habagatang kasadpan sa lungsod sa Sarangani, alas 11:41 sa buntag.

Nasundan kini sa magnitude 5.9, mga 207 kilometros sa habagatang kasadpan sa Sarangani ug 10-kilometros ang gilawmon.

Banda alas 4:51 sa hapon, natala sa Phivolcs ang magnitude 4.1, mga 244 kilometros sa habagatang kasadpan sa samang lungsod ug kuwatro kilometros ang gilawmon.

Kagahapong adlawa, Huwebes, mitay-og na sab ang magnitude 4.3 nga linog, mga 269 kilometros sa habagatang kasadpan sa Sarangani ug pito ka kilometro ang gilawmon.

Gitataw sa Phivocs nga pulos tectonic ang origin sa maong mga linog apan way damyos apan posible ang mga aftershocks.

Gumikan niini, giawhag ni Camoro ang ilang mga molupyo nga mag-igmat sa kanunay ilabi na ang mga nanimuyo sa daplin sa kabaybayonan aron gilayong makabakwit kon ugaling magpagawas og tsunami alert ang Phivolcs.

Hinuon, sa nahitabo nga sagunsong linog, giklaro sa Phivolcs nga wa kini tsunami alert.

Samtang nagpasidaan sab si Governor Claude Bautista sa ilang katawhan nga kanunay mahimong vigilante sa mga ingon niining kalamidad ug gamiton kanunay ang dock, cover and hold sa pagluwas sa kaugalingon.

Nagpahinumdom ang amahan sa probinsiya nga kanunay mangandam sanglit di matagna ang pag-abot sa kalamidad sama sa linog. (Orlando B. Dinoy)


Source: Sun.Star Superbalita (https://www.sunstar.com.ph/article/1869786/Superbalita-Davao/Balita/Sagunsong-tay-og-way-damyos?ref=rss&format=simple&link=link)

No comments