Recent Posts

Breaking News

Retiradong pulis gibanhigan-patay


NAKABSAN sa iyang kinabuhi si retired Police Inspector Edmund dela Rosa Junco, 65, gumikan sa samad pinusilan sa iyang liog ug tiyan sa dihang gi-ambush sa riding-in-tandem, samtang nagmaneho sa puti nga Toyota Hilux uban sa iyang misis.

Ang magtiayon nagsubay sa dalan sa Nasipit, Barangay Talamban, Cebu City nga gikan sa downtown area pauli sa ilang balay sa maong barangay, niadtong Martes sa hapon, Septiyembre 15, 2020.

Samtang tulo ka lalake nga luwan sa ilang tagsa-tagsa ka mga motorsiklo ang nangaangol sa dihang nadasmagan sa sakyanan ni Junco, samtang ang usa gikatahong na-igo sa saag nga bala.

Atol niining pagsuwat giila pa ang mga nangaangol.

Nagkanayon ang hepe sa Talamban Police Station, Cebu City Police Office, PMajor Jonathan Taneo, nga adunay duha ka lalake sakay sa Yamaha NMax, nagsul-ob sa full face helmet ug bonnet ang mipauwan og bala ngadto sa sakyanan ni Junco.

Nagtuo si Taneo nga gisundan sa gunmen si Junco gikan sa pa sa downtown.

Samaran sab ang iyang misis nga si Betty Uy Junco, 57, apan gihulagway nga dili grabe.

NIDASMAG

Base sa inisyal nga kasayuran nahipos sa kapulisan nga gitaparan ang sakyanan ni Junco sa mamumuno nga nagmotorsiklo dayon namusil.

Mihunat sa pagpadagan ang gunmen dayon mi-U-turn ug misugat sa sakyanan ni Junco ug giusban pa sa pagpamusil, apan gidasmagan ang mga mamumuno resulta sa pagkaguba sa NMax nga motor.

Apan nakalayat ang mga sakay niini ug misibat dayon ilog og laing motorsiklo nga gigamit nilang getaway palayo sa crime scene.

Nakita sab sa CCTV camera duol sa nahitaboan nga nakapadagan si Junco kapin sa 30 metros nga gilay-on bisan nga samaran, hinungdan nga iyang nadasmagan ang duha ka motorista, diin usa niini Grab driver.

Si Junco naay samad pinusilan sa iyang liog ug tiyan.

UNSAY MOTIBO?

Wala nila isalikway ang posibilidad nga dunay mga tawong nasuko ni Junco dihang aktibo pa kini sa PNP.

Sa pangutana kun kabahin ba sa mga nalakip sa narcolist ang kanhi pulis, sumala pa ni Taneo nga ila pang kining sutaon.

Katapusang assignment ni Junco mao sa Criminal Intelligence and Detection Group (CIDG7) sa wa pa kini moretiro niadtong 2015. (GPL)


Source: Sun.Star Superbalita (https://www.sunstar.com.ph/article/1870339/Superbalita-Cebu/Balita/Retiradong-pulis-gibanhigan-patay?ref=rss&format=simple&link=link)

No comments