Recent Posts

Breaking News

Pasidan-an sa mga mo-post sa fake news


MIBAHAD ang hepe sa kapulisan sa Central Visayas sa mga tawong nagpakatap og impormasyon sa social media nga makapaalarma labot sa kaso sa coronavirus disease 2019 (Covid-19) sa tibuok rehiyon nga mohimo silag imbestigasyon labot niini.

Wala hinuoy gibutyag si Police Brigadier General Albert Ignatius Ferro kung kinsa ang maong personalidad nga naghimo niini diha sa social media apan, matod niya, ang kapulisan mosusi sa mga pagpangdaot nga walay basehanan.

Iyang gipasabot nga dili angayan nga mohimog pamahayag ang bisan kinsa nga maka pahadlok sa publiko nga walay ebedensya tungod kay ila gyud kini nga pasakaan ug kaso ngadto sa korte ug gipaniguro niya nga bilangoon gyud kini.

Dunay tahasan ang PRO-7 nga personnel nga mohimo sa imbestigasyon uban ang PNP Anti-Cyber Crime Unit.

Ang adunay katungod nga mopahibawo sa publiko mao ra ang Department of Health (DOH) lakip na ang mga opisyal sa lokal nga kagamhanan sa dakbayan ug sa probinsya.

Lakip sa iyang gibaharan kadtong mga tawo nga magbinuang sa contact tracing forms nga dili mohatag sa saktong impormasyon o detalye kung sila nakahimamat sa tawo o mga tawong nagpositibo sa Covid-19. (AYB)


Source: Sun.Star Superbalita (https://www.sunstar.com.ph/article/1870181/Superbalita-Cebu/Balita/Pasidan-an-sa-mga-mo-post-sa-fake-news?ref=rss&format=simple&link=link)

No comments