Recent Posts

Breaking News

Palengke sa Tagum City gi-lockdown


DAVAO DEL NORTE -- Temporaryong gisirado ang publikong palengke sa siyudad sa Tagum sugod kagahapon, Septyembre 8, hangtud sa Septyembre 14 alang sa decontamination sa tibuok palengke.

Kini human nga dunay nanag-iya og stall sa palengke nga giingong nagpositibo sa coronavirus disease (Covid-19).

Kini base sa gibutyag ni Tagum City Mayor Allan Rellon subay sab sa post sa opisyal Facebook page sa lokal nga panggamhanan sa siyudad.

Gihimo ang lakang subay sab sa suhesyon ni Dr. Arnel Florendo sa City Health Office human nagpositibo sa Covid 19 ang tag-iya sa stall number 572 sa fish section sulod sa palengke.

Matud pa nga ang pasyente mao ang bag-ong nagpositibo sa Covid-19 sa siyudad nga usa ka 50 anyos nga babaye nga taga Barangay Visayan Village nga dunay travel history sa Mangagoy sanglit usa kini ka negusyante ug kumprador og isda.

Matud ni Florendo nga ang pasyente nagpa-check-up sa Rivera Medical Clinic niadtong Septyembre 5, sanglit duna kini gipamati nga ubo, sip-on ug kalintura ug gi-refer ngadto sa Davao Regional Medical Center.

Ang resulta nigawas niadtong Septyembre 6 ug nagpositibo sa kagaw ang pasyente, kinsa naka-admit na sa Davao Regional Medical Center.

Tungod niini, nanawagan si Florendo sa mga tawo nga naka-transact niini sa palengke, labi na sa mga tawo nga nakaadto sa stall number 572 gikan Agosto 20, 2020 hangtud Septyembre 6, 2020 nga mokontak sa Covid-19 Hotline aron nga mamonitor o ma-check-up ang kahimtang sa lawas.

Wa pay gipaguwa nga opisyal nga mando ang lokal nga panggamhanan sa siyudad kabahin sa pagpamalengke sa mga tawo sa siyudad.

Apan gikanayon ni Purok Chairman Joverto Tancogo sa Barangay San Miguel sa dihang nahinabi sa Super Balita nga dili kaayo problema sa ilang barangay ang pagsira sa public market sanglit dunay nagsuroy-suroy og isda ug gulay.

Gawas niini, duna say mga baligya ang ilang barangay nga uban pang mga batakang palaliton nga mahimong pahimuslan samtang sirado ang palengke sa Tagum. (Dexter T. Visitacion)


Source: Sun.Star Superbalita (https://www.sunstar.com.ph/article/1869568/Superbalita-Davao/Balita/Palengke-sa-Tagum-City-gi-lockdown?ref=rss&format=simple&link=link)

No comments