Recent Posts

Breaking News

Pagdili sa taga-Cebu City, ipaklaro ni Ferro


BUOT ipaklaro sa direktor sa Police Regional Office (PRO7) Police Brigadier General Albert Ignatius Ferro sa polisiya sa Kapitolyo may labot sa na-unang pamahayag ni Gobernador Gwendolyn Garcia sa Sugbo.

Si Garcia makigsabot ngadto sa local chief executives sa probinsiya sa tinguha nga did-an una ang mga taga-dakbayan sa Sugbo nga makasuroy-suroy sa mga tourist destination sa lalawigan.

“We need to come up with a clear policy on that, kay di ba sa policy sa IATF guidelines there are some easing of some restrictions. So we need to clarify those issues with the governor,” matod ni Ferro.

Matod ni Ferro, gumikan kay gipa-ubos na sa modified general community quarantine (MGCQ) status ang dakbayan ug lalawigan sa Sugbo gikinahanglan nga adunay klaro nga guidelines ang probinsiya kon motakdo ngadto sa lagda sa Inter-Agency Task Force (IATF).

Gitug-an sa opisyal nga wala pa siya konsultaha sa maong tinguha sa gobernador gani aduna unta silay gitakda nga meeting apan nakalarga siya paingon sa lalawigan sa Bohol tungod sa duha ka police nga naangol atol sa ilang operation.

Bisan pa man nga nag- MGCQ na ang tibuok probinsya sa Sugbo giklaro ni Ferro nga wala sila mo relax sa ilang border checkpoints sa matag lungsod.

Samtang, wa mausab ang naunang desisyon ni Garcia nga pugngan una ang mga taga-dakbayan sa Sugbo nga maka-suroysuroy sa nagkadaiyang tourist destination sa lalawigan.

Ang probinsya sa Sugbo mibukas kini sa tourism activities ubos sa MGCQ subay sa paglaom nga makatabang kini sa nalusno nga ekonomiya sa probinsya.

Lakip sa labing unang gibuksan mao ang whaleshark watching sa lungsod sa Oslob, diving sa lungsod sa Moalboal, All-terrain Vehicle (ATV) Adventure sa lungsod sa Barili ug canyoneering sa Badian ug Alegria.

Una na nga mipadayag si Garcia nga sa pagbukas sa turismo sa probinsya mga local tourist lang una ang gitugotan pagbisita, nagpasabot nga mga residente sa Probinsya.

Wala pay turista gikan sa laing isla ilabi na kadtong gikan sa critical zones.

Atol sa pakighinabi sa mga tigbalita sa Septiyembre 14, gipadayag ni Garcia nga samtang anaa pa ang presensiya sa kagaw, mas maayo nga dili mo kumpiyansa.

“Under MGCQ allowed na ang tourism. I’m warning you, you’ll have to deal with me because I’m protecting the livelihood of 600 canyoneering guides in Badian, more than 300 guides in Alegria.”

“I’m protecting close to 300 pumpboat operators in Cordova, 100 kapin sa Moalboal. I’m protecting the resorts that have open up naa nay nakatrabaho ug balik, I’m protecting the Cebuanos here,” dason ni Garcia.

Subay sa lagda sa IATF mahimo na nga makalabang sa mga lungsod kon MGCQ to MGCQ ang zones nga padulngan.

Apan matod ni Garcia mas maayo nang masiguro aron dili na mosaka pa ang mga positibong kaso sa Covid sa probinsya.

Subay sa datos sa DOH ang lalawigan adunay 538 ka aktibong kaso, 4, 194 ang naka-recover apan 328 na ang namatay. / AYB, ANV


Source: Sun.Star Superbalita (https://www.sunstar.com.ph/article/1870320/Superbalita-Cebu/Balita/Pagdili-sa-taga-Cebu-City-ipaklaro-ni-Ferro?ref=rss&format=simple&link=link)

No comments