Recent Posts

Breaking News

P500M pagtiwas sa 10-storey CCMC bldg.


IDUSO na ning semana sa Department of Engineering and Public Works (DEPW) ang program og works and estimates (Powe) sa P500 milyones alang sa hingpit nga pagtiwas sa 10 ka andanang Cebu City Medical Center (CCMC).

Si Lowell Corminal, officer in-charge sa buhatan sa Assistant City Engineer, nagkanayon nga 95% nang nakumpleto ang Powe ug posible karon o ugma, maduso na nila kini ngadto sa buhatan ni Rodjun Taneo Jr., chairman sa bids and awards committee (BAC) para sa imprastraktura.

Si Taneo, sa iyang bahin, nagkanayon nga ang Powe na lang ang ilang gipaabot para makairog na ang pagproseso sa pagpa-bidding para masumpay ang ika-7 hangtod sa ika-10 nga andana sa modernong pasilidad sa Cebu City nga maoy kadangpan sa mga kabus nga maospital.

“As soon as we have those documents, we will jumpstart na for our pre-procurement process so that we could catch up the timeline as directed by Mayor Labella who promised that he will finish CCMC in his first term,” padayag ni Taneo.

Gipadayag sa chairman sa BAC-Infra nga kon madawat na nila ang dokumento karong semanaha, molanat kini og labing dugay usa ka buwan ang procurement process gikan sa pre-bidding conference hangtod sa post qualication ug pag-isyu sa notice of award ug pinirmahay sa kontrata.

Gibanabana ni Taneo nga sa hinapos nga semana sa Oktubre mahuman na ang bidding process ug labing dugay human sa Kalag-kalag, makasugod na ang contractor nga maoy nidaog sa public bidding.

Si Taneo nagkanayon nga nahaom usab kini sanglit nagpadayon ang pag-istalar sa mechanical, electrical ug ubang gikinahanglan sa unang tulo ka andana sa CCMC nga nahimutang sa dalan Panganiban ug matapos kini sa unang quarter sa 2021.

Kon mahuman na ang pagdugang sa upat ka andana sa CCMC nga gibanabanang molanat og walo ka buwan, mahimo nang makasugod og operate ang unang tulo ka andana nga makaigo og 160 ka mga katre samtang magtiwas sa mga interior installation sa nag-unang pito ka mga andana sa ospital. (PAC)


Source: Sun.Star Superbalita (https://www.sunstar.com.ph/article/1870462/Superbalita-Cebu/Balita/P500M-pagtiwas-sa-10-storey-CCMC-bldg?ref=rss&format=simple&link=link)

No comments