Recent Posts

Breaking News

P1.5M kapin shabu nasakmit


KAPIN sa P1.5 milyunes nga shabu nasakmit sa managlahing buy-busts sa kapulisan sa mga dakbayan sa Sugbo, Mandaue ug Talisay.

CEBU CITY

Ang mga operatiba sa Drug Enforcement Unit (DEU) sa Parian Police Station 1 ug Abellana Police Station 2 ninghimo og operasyon batok sa ilegal nga drugas niadtong Dominggo, Septiyemre 6.

Si PMaj. Armando Labora Jr., hepe sa Parian Police Station 1, niingon ga ang ronda gilusad sa Sityo Ibabao sa Barangay Mambaling, pasado alas 3:00 sa hapon niadtong Dominggo nga miresulta sa pagkadakop sa ilang target.

Giila ni Labora ang ilang nadakpan nga si Anabelle Gonzales, 42, way trabaho, buwag sa bana ug molupyo sa maong dapit.

Nasakmit gikan kang Gonzales ang moabot na sa P275 mil nga balor sa gidling drugas.

Matud ni Labora, makonsiderar si Gonzales nga high value individual (HVT) tungod sa kadako nga mabaligya niini subay sa ilang pagpaniid ug dugang ni Labora , naabtan sa akto ang suspek nga nagbahig sa shabu.

Pasangil sa dinakpan nga binilin lang sa iyaha ang mga nasakmit bugti sa P2 mil nga suhol.

Dugang sa suspek, nisulod sa maong buhat alang sa iyang walo ka mga anak nga tua sa probinsiya.

Sa laing hugna sa ronda sa Abellana Police Station 2, laing HVT ang nadakpan.

Si PMaj. Elizandro Quijano, nangu sa pagronda, niila sa nasikop nga si Christopher Babatid alyas Pinga, 39, ug taga Barangay Sambag 2.

Si Babatid nakuhaan ug drugas nga mobalorog P1.3 milyunes nga gidiling drugas value.

Ang banabana sa balor sa drugas gibase sa value nga gilatid sa Dangerous Drugs Board (DDB).

TALISAY CITY

Tulo ang nadakpan sa duha ka operasyon sa dakbayan sa Talisay niadtong Sabado sa gabii, Septiyembre 5, ug Dominggo sa kaadlawon, Septiyembre 6.

Ang mga operatiba sa Provincial Intelligence Unit (PIU) ug Provicinal Drug |Enforcement UNit (PDEU) sa Cebu Provincial Police Office (CCP0) lakip na ang Talisay City Police Station nihimo og hiniusang pagpangronda sa Barangay Dumlog.

Si PLt Col. Randy Korret, pangulo sa PIU-CPPO,niila sa ilang dinakpan nga si Sheena Echavez, 33, molupyo sa Barangay Tabunok,

Lakip nga nadakpan ang giingong suluguon ni Echaves nga si Mark Basinillio, 40, ug molupyo sa Barangay Dumlog.

Nasakmit sa duha nga drugas ang 25 gramos nga mobalor na og P170,000.

Samtang si Echaves gikonsiderar sa kapulisan nga HVT drug personality tungod sa pagkalambigit sa tulo ka mga lalake nga pulos nalambigit sa drugas.

Matud ni Korret, si Echaves ang kanhi uyab ni anhing PO1 Dave Agcol, napatay sa operasyon sa Regional Special Operations Group (RSOG) -7 niadtong Agusto 2016 dihang nisukol sa pagronda.

Si Echaves nakarelasyon sa laing lalake nga naa na sa prisohan karon sa kaso sa gidiling drugas apan nagkabuwag na.

ng iyang kasamtangan nga kapuyo napriso na usab sa pareho nga kaso.

Dihang gikahinabi sa media, ang dinakpan wala na mopagawas sa iyang habig kalabot na sa pagkadakop kaniya.

Samtang, naa sa listahan sa Talisay City Police Station nga top ten most wanted nadakpan niadtong Dominggo, Septiyembre 6, pasado alas 8 sa gabii sa sa Mananga 2 sa Barangay Tabunok.

Si Rejan Amparo Bagonggong, hingkud ang edad, ug molopyo sa nasoy nga dapit, nasikop human gironda sa mga operatiba sa DEU sa kapulisan sa dakbayan ug nakakuhaan og 11 ka mga pakete sa shabu lakip na ang napalit sa posuer buyer.

Si Bagonggong dunay warrant of arrest sa kaso nga robbery nga giisyu ni Hon.Judge Glienda Go sa RTC sa dakbayan sa Talisay.

Si Bagonggong gawas sa iyang daan na nga giatubang sa kasong robbery duna usab dugang kaso sa pagpamaligya sa gidiling drugas.

MANDAUE CITY

Lima ka tawo nasikop sa human nakuhaan og gidiling drugas atol sa random checkpoint sa A.C. Cortes Ave., Barangay Cambaro, Mandaue City niadtong Dominggo, Setyembre 6, ala una ngadto sa alas dos sa hapon.

Usa sa mga nasikop nag-ID pa og opisyal nga ID sa Inter-Agency Task Force (IATF).

Giila kini nga si John Lister Andrade, 39, usa ka residente sa Barangay Pagsabungan, Mandaue City.

Matod ni PMaj. Aldrin Villacampa, hepe sa Opao Police Station, nga ang IATF nga ID gikan kini sa kompanya nga gitrabahoan niya sauna ug karon nga wala na siya magtrabaho ngadto mao kini iyang gamiton nga maghabalhabal.

Gamiton sab kini niya ang ID aron siya makalabang labang lang sa borders.

Lakip sa lima nga nasikop mao sila si Richard Espinosa Abi, 44, taga Barangay Maguikay, Mandaue City; si Francis Hoyas, 34, taga Maribago, LapuLapu City; Roel Para, 39, Zone Sibuyas, Barangay Paknaan, Mandaue City; ug Buenaventura Apa, 47, taga Sango, Lapu-Lapu City.

Wala pa matino nilang Villacampa ang gramos sa maong mga ginadiling drugas o shabu.

Matod ni Villacampa nga gagmay lang kini nga pakiti ug makita nga pang-personal lang kini nga gamit.

Gibanabana nga ang kintabuk-ang value sa drugas mukabat ngadto sa P7,000.

Atol sa checkpoint, tulo sa lima nagmotorsiklo samtang ang duha niini nasakay og bisikleta.

Ang lima anaa sa detention cell sa Opao Police Station.

Matod ni Villacampa, dili ra kinahanglan nga maduso ang lima ngadto sa Mandaue City Jail ug mamahimo ra silang makapyansa. (BBT, KFD)


Source: Sun.Star Superbalita (https://www.sunstar.com.ph/article/1869479/Superbalita-Cebu/Balita/P15M-kapin-shabu-nasakmit?ref=rss&format=simple&link=link)

No comments