Recent Posts

Breaking News

Opisyal sa MGB 7 ipatawag sa Hunta sa Lalawigan


GIUYONAN sa Hunta Probinsyal atol sa sisyon kagahapon, Septiyembre 14, ang pagdapit ni Mines and Geosciences Bureau (MGB) 7 Regional Director Engr. Loreto Alburo sa ilang sunod nga sisyon.

Ang Hunta buot masayod sa sa iyang habig bahin sa pag-issue og Ore Transport Permit sa Philippine Mining Service Corp. nga nag-supply og gidugmok nga dolomites nga gihimong substitute sa “white sand” sa Manila Bay rehablitation project.

Ang imbitasyon subay sa resolusyon ni Bokal John Ismael Borgonia nga nag kondinar sa pag luwat og permit sa MGB sa naasoyng kompaniya.

Una na nga namahayag si Borgonia labot sa pagpakaway bili sa mga nipasiugda sa proyekto nga wa man makahimo sa pagpahibaw sa probinsya labot sa pag extract og dolomites sa lungsod sa Alcoy.

Subay sa maong isyu, mirekomendar ang Palasyo pinaagi ni Secretary Harry Roque sa pagbukas sa komunikasyon sa Probinsya ngadto sa Department of Environment and Natural Resources (DENR) sa mas hapsay nga panagsabot.

Wa hinuon mo supak ang palasyo sa pagpahunong sa kagamhanan sa Probinsya sa pag supply sa nahabilin nga 7,000 ka wet metric tons sa dolomites sa Manila bay sanglit gipahibaw na usab sa Korte Suprema nga kinahanglan sanghiran usab ang lokal nga kagamhanan sa ipahigayon nga mga proyekto.

Subay niini, wala pay taho ang Mayor sa Alcoy Michael Sestoso labot sa nasabutan niini tali sa mga kompanya nga nag operate sa lungsod. (ANV)


Source: Sun.Star Superbalita (https://www.sunstar.com.ph/article/1870206/Superbalita-Cebu/Balita/Opisyal-sa-MGB-7-ipatawag-sa-Hunta-sa-Lalawigan?ref=rss&format=simple&link=link)

No comments