Recent Posts

Breaking News

Nasikop human sa 10 ka tuig nga pagtago


SUSPEK sa pagpatay sa usa ka bayot niadtong 2010 sa lungsod sa Minglanilla nadakpan sa mga sakop sa Talisay City Police Station sa Martes sa buntag, Septiyembre 8, 2020.

Ang suspek giilang si Richard Mandal, 43, ulitawo, taga Fidel Bas street, Lower Mohon, Dakbayan sa Talisay. Si Mandal no. 4 most wanted sa kapulisan sa Dakbayan sa Talisay.

Si Mandal nasikop sa Bato, lungsod sa Samboan, habagatang Sugbo.

Siya gidakop pinasikad sa warrant of arrest nga giisyu ni Judge Lauro Castillo Jr. sa Regional Trial Court Branch 5 sa Syudad sa Sugbo sa kasong murder.

Si Police Major Gerard Ace Pelare, hepe sa Talisay City Police Station, nibutyag nga si Mandal nagtago-tago human sa pagpatay kang Alberto Navarro, 50, taga Lawaan 1, Dakbayan sa Talisay.

Siya nitago sa Barangay Tampi, San Jose, Negros Oriental apan nahibaw-an nga mopauli siya sa Syudad sa Talisay sa Martes sa buntag.

Wa maglangay ang kapulisan, ilang gipaabot si Mandal sa pantalan sa Samboan hinungdan nga ilang nadakpan. (BBT)


Source: Sun.Star Superbalita (https://www.sunstar.com.ph/article/1869599/Superbalita-Cebu/Balita/Nasikop-human-sa-10-ka-tuig-nga-pagtago?ref=rss&format=simple&link=link)

No comments