Recent Posts

Breaking News

Modified lockdown sa 6 ka barangay nga dunay ASF


MAGSAYSAY, Davao del Sur -- Miabot na ang 15 ka adlaw nga takna sa total lockdown sa tibuok lungsod human mikuyanap ang African Swine Fever (ASF) nga gisugdan niadtong Agosto 11.

Apan subling nagdeklara ang lokal nga gobyerno og modified lockdown sa unom ka mga barangay nga pabilin ang presensiya sa ASF.

Nag-una ang Barangay Barayong sa pinakadaghang baboy nga de-populate tungod sa taas nga ihap nga natakbuyan sa ASF human natala ang 991 ka baboy ug 179 ka mga hog raisers ang apektado.

Gisundan kini sa Barangay Mabini diin apektado ang 48 ka mga hog raisers ug 277 ka baboy ang nade-populate.

Ikatulo ang Barangay Kasuga nga naay 17 ka hog raisers ang apektado ug mokabat sa 91 ka baboy ang gipamatay.

Nagsunod ang Barangay Dalawinon nga adunay 20 ka nag-baboyan ang apektado human 108 ka mga buhing baboy ang gipanglubong.

Ikalima ang Barangay Tagaytay human 27 ka hog raisers ang apektado ug 95 ka baboy ang gipamatay.

Ikaunom ang Barangay Balnate diin 25 ka mag-uuma ang apektado ug 87 ka baboy ang nade-populate.

Sa datos sa Municipal Agriculture Office (MAO), mokabat na sa 1,649 ang mga baboy nga gipailawom sa culling ug 315 ang mga apektadong nagbaboyan.

Giangkon sa lokal nga gobyerno nga naghitak ang ASF sa ilang lugar, hinungdan nga gipatuman sa MAO ang color coding diin ang kolor pink mao kadtong mga barangay nga adunay namatay nga mga baboy apan wa pa miguwa ang resulta sa blood sample.

Ang kolor pula mao ang unom ka barangay diin namatay na ang mga baboy ug miguwa sa resulta nga positibo sa ASF hinungdan nga "no movement" gihapon ang mga baboy ug wa gitugtan nga makaihaw.

Si Helen Carampatana, MAO officer sa lungsod, nagbutyag nga hayan niabot na sa Barangay Poblacion ang ASF human adunay baboy nga suspek sa Purok 16 sa Sitio Ecoland apan wa pa miguwa ang resulta sa test.

Gawas nga kolor pink ang Barangay Poblacion, regulated sab ang mga barangay sa Bacungan, San Miguel, Upper Bala, Malungon ug Dalumay.

Hinuon, giklaro sa MAO nga mahimo nang makaihaw og baboy ang mga anaa sa kolor green sama sa ubang bahin sa Brgy. Poblacion diin nahisakop ang merkado publiko ug mga meat shop nga layo sa 500 meter radius.

Gikinahanglan nga dalhon sa slaughterhouse ang mga baboy nga ihawon aron ibaligya apil ang mga adunay okasyon nga dunay koordinasyon sa MAO.

Nahilakip sa kolor green ang siyam ka lugar diin ASF-free kini nga mao ang mga barangay sa Glamang, Maibo, Kanapolo, Bala, Malawanit, New Ilocos, New Opon, San Isidro ug Tacul.

Giklaro sa lokal nga gobyerno nga mahimong dakpon o makasohan ang bisan kinsa nga indibiduwal nga mosupak sa maong direktiba sa lokal nga gobyerno. (Orlando B. Dinoy)


Source: Sun.Star Superbalita (https://www.sunstar.com.ph/article/1869666/Superbalita-Davao/Balita/Modified-lockdown-sa-6-ka-barangay-nga-dunay-ASF?ref=rss&format=simple&link=link)

No comments