Recent Posts

Breaking News

Mga kapitan gitahasan sa istriktong pagbantay sa ilang isolation unit


BANSALAN, Davao del Sur -- Nagpagula na og memorandum order ang lokal nga gobyerno ngadto sa tanang kapitan sa 25 ka mga barangay kabahin sa istriktong pagbantay sa ilang mga isolation units.

Gipaguwa ni Mayor Quilin Sarte ang maong mando human nahitabo ang pag-panic sa mga netizens dihang mikatap sa social media nga usa ka sakop sa lesbian, gay, bisexual, transgender (LGBT) ang nakasibat sa isolation unit sa Baranga Dolo ug naglatagaw kini sa pipila ka mga okasyon.

Kahibalo ang usa locally stranded individual (LSI) ang 20-anyos nga miyembro sa LGBT kinsa gikan sa Metro Manila ug dihang mipauli gibutang kini sa isolation unit sa maong dapit.

Dihang milakaw ang midwife nga nagbantay kaniya, milakaw sab ang pasyente padung sa merkado publiko diin nakigkita sa iyang mga kanhi kauban sa trabaho ug nakahimo pa pagpangaon sa barbeque avenue sa lugar.

Gawas sa pagsuroy-suroy, mitambong sab kini og pipila ka birthday party ug lamay sa minatay.

Sa miaging semana lang, miguwa ang swab test sa pasyente nga asymptomatic kini sa Covid-19.

Hinuon, nagnegatibo ang resulta sa test sa unang 10 ka mga tawo nga giingong nakaduol sa pasyente.

Sa mando sa mayor, obligado ang mga opisyal sa barangay nga i-monitor ang mga LSI o returning overseas Filipino (ROF) nga anaa sa ilang quarantine facility.

Gikinahanglan sab nga 24/7 ang pagbantay sa mga pasilidad ug itaho gilayon sa Inter-Agency Task Force sa lungsod ang si bisan kinsa nga molapas sa protocol.

Sa kasamtangan, wa pa’y tubag ang mga opisyal sa Barangay Dolo kon nganong gitugtan nga maglatagaw ang LGBT nga natakbuyan sa Covid-19.


Source: Sun.Star Superbalita (https://www.sunstar.com.ph/article/1870066/Superbalita-Davao/Balita/Mga-kapitan-gitahasan-sa-istriktong-pagbantay-sa-ilang-isolation-unit?ref=rss&format=simple&link=link)

No comments