Recent Posts

Breaking News

Mga bus makapamasahero hangtod alas 10 sa gabii


MAS taas na nga oras ma kapamasahero ang mga bus sa Cebu south Bus Terminal (CsBT) kay gitugotan na sila nga makapadagan gikan sa alas 5 sa buntag hangtod sa alas 10 sa gabii .

Sukad sa pagbukas og balik sa CSBT tunga-tunga ning semanaha, hangtod lang sa alas 6 sa gabii sila makapamasahero.

Apan sa tigom tali nila ni Cebu City Mayor Edgardo Labella ug sa Cebu Provincial Bus Operators Transport Cooperative (CPBOTC) pinangulohan ni Barili Mayor Julie Flores, ilang nasabutan nga hangtod sa alas 10 sa gabii sila makapamasahero.

Gikan sa alas 10 sa gabii hangtod sa alas 5 sa buntag, way gitugtang bus nga makadagan.

Tungod niini, sila si Flores ug kaubanan nipasalamat kang Labella. Ilang gisaaran si Labella nga ipatuman nila sa higpit ang mga health protocol, sama sa social distancing, pagpasul-ob og mask, face shield sa tanang mga pasahero.

“Una sa tanan mapasalamaton kaayo ko ni Mayor Ed Labella sa iyang pagtugot kanamo nga makasulod na mi og balik sa CSBT. Laomi, Mayor Labella, nga ang tanang health protocol amo gyud nga ipatuman sa among mga buses. Og unsa may lagda nga ipahamtang, amo gyud ning tumanon,” padayag ni Flores sa ilang tigom tali sa mayor.

Base sa ilang nasabotan, ang mga minibus, bus nga gikan sa lalawigan adto moagi sa South Road Properties (SRP).

Sila dili mopasakay ug mopakanaog og mga pasahero sa rota nga ilang maagian ko naa na sila sulod Cebu City.

Si Labella kinsa nipatawag og tigom sa grupo ni Flores uban ang kadagkuan sa management sa Ceres, Land Transportation Franchising and Regulatory Board (LTFRB) VIi, Cebu City Transportation Office (CCTO), Cebu City Police Office, Traffic Group sa Talisay City, Konsehal Joel Garganera ug Konsehal Dave Tumulak aron masiguro nga mapatuman ang minimum health protocol sa tanang oras ug higayon sulod sa bus ug gawas sa terminal.

“Ang atong mga minimum health protocol kinahanglan nga ipatuman sulod ug gawas sa terminal because the virus is very much around. Ug kinahanglan nga i-observe aron malikayan ang pag-spread sa virus kay labing daghana ra ba sa mga tawo nga moabot diha sa terminal,” padayag ni Labella.

Gawas niini, ipatuman sab sa mayor ang curfew sa siyudad gikan sa alas 10 sa gabii hangtod alas 5 sa buntag sa maong terminal.

Nipasabot si Labella nga iyang gipatawag ang mga bus operator kay bisan kon ang CSBT iyaha sa Kapitolyo, apan ang nahimutangan niini ubos sa iyang hurisdiksyon.

NAMALIK NA

Si Flores, sa iyang bahin, nagkanayon nga di na limitado ang mga bus ug mini bus nga mosulod ug gawas sa CSBT sanglit sila nipadagan na sa ilang mga unit para pagkarga sa mga pasahero nga mosulod ug mogawas sa dakbayan.

Sa pagbukas sa CSBT niadtong Miyerkules, Septiyembre 9, 2020, mokabat lang sa 20 ka mga bus ang nanulod. Mao ra usab kini ang gidaghanon sa mga bus nga nagdagan sa habagatang bahin sa Sugbo sukad gibalik ang pampublikong transportasyon dihang ubos na ang Lalawigan sa Sugbo sa general community quarantine (GCQ) mga upat ka buwan na ang nakalabay.

Diha ra usab sila kutob sa Lantaw SRP sa Cebu South Coastal Road (CSCR), apan gitugtan sila sa pagsulod karon na nga ubos ang siyudad sa modified GCQ gikan sa Septiyembre 1-30.

KITA MIUS-US

Nagduda ang management sa CSBT kon mahibalik pa ba ang kaniadto kita nila nga moabot og P200,000 ang adlaw.

Gani, gikan sa Septiyembre 9-11, nikita lang sila og P70,000 sud sa tulo ka mga adlaw.

Matod ni Carmen Quijano, terminal manager, nga lisod pa mahibalik ang naandang kita karon nga gi-limit ang oras ug di pa makabiyahe ang mga senior citizen ug mga nagpanuigon og 21 anyos paubos.

Gipaabot kining mosaka karon nga gitugtan na silang maka operate hangtod sa alas 10 sa gabii, sa di pa magsugod ang oras sa curfew sa siyudad.

Gibana-bana ni Quijano nga moabot na lang sa P40,000 ngadto sa P60,000 ang kitaon sa terminal matag adlaw.

Dako usab og alkanse ang terminal sa kita gikan sa mga tindahan nga nag-abang sa sulod.

Sa pagsugod sa lockdown wala na sila magtinda ug wala na usa’y nadawat nga abang ang terminal. Sagad sa mga tindahan nagabang kini og P5,000 ngadto na sa P40,000 matag buwan, magdepende sa gidak-on sa lugar niini.


Source: Sun.Star Superbalita (https://www.sunstar.com.ph/article/1869977/Superbalita-Cebu/Balita/Mga-bus-makapamasahero-hangtod-alas-10-sa-gabii?ref=rss&format=simple&link=link)

No comments