Recent Posts

Breaking News

Major Pelare morekomendar sa pagpasira sa mga sam-ang


ANG kapulisan sa Dakbayan sa Talisay morekomendar ngadto kang Mayor Gerald Anthony Gullas Jr. nga sirhan ang mga sam-ang sa dakbayan atol sa mga Adlaw sa Santo ug Kalagkalag.

Si Police Major Gerard Ace Pelare, hepe sa Talisay City Police Station, nibutyag nga morekomindar siya kang Gullas nga mas maayong di lang una pasudlan ang mga sam-ang sa dakbayan nianang mga adlawa.

Nalantawan ni Pelare nga dagsaon sa katawhan nianang adlawa ang mga sam-ang ug di na mapatuman ang social distancing ug uban pa nga mga health protocol.

Si Pelare niingon nga kon siya pangutan-on ni Gullas labot niini, iya kining ingnon nga mas maayo nga way tugotan nga mobisita sa ilang mga minahal sa kinabuhi nga mitaliwan na sa mao nga mga adlaw.

Dihang nahinabi ang mayor sa Superbalita Cebu, kalabot niini, si Gullas niingon nga makigtagbo una siya sa pipila ka mga opisyal sa Syudad ingon man sa taga Inter-Agency Task Force (IATF) kon unsa ang ilang panahom labot niini.

“When there is gathering, it is like you are inviting the virus,” butyag ni Pelare.

Ang Dakbayan sa Talisay gipaubos sa modified general community quarantine (MGCQ) apan wa nagpasabot nga nilugak sila sa ilang health protocol.

Ang mga Dakbayan sa Sugbo ug Mandaue mopasirado sa ilang mga sam-ang sud sa pipila ka mga adlaw, apil na sa Nobiyembre 1-2 aron malikayan ang pagdagsa sa mga tawo sa mga sementeryo. (BBT )


Source: Sun.Star Superbalita (https://www.sunstar.com.ph/article/1870468/Superbalita-Cebu/Balita/Major-Pelare-morekomendar-sa-pagpasira-sa-mga-sam-ang?ref=rss&format=simple&link=link)

No comments