Recent Posts

Breaking News

M6.4 nga linog sa Davao Occidental wa'y damyos


GIKLARO sa Provincial Disaster Risk Reduction and Management Office (PDRRMO) sa lalawigan sa Davao Occidental nga wa'y naitalang damyos ug kinabuhing naangol atol sa pagtay-og sa kusog nga linog Dominggo sa gabii, Septembre 6.

Matod ni Harry Chester Camoro, PDRRMO action officer, nga dako ilang pasalamat nga luwas ang tanang molupyo sa lalawigan.

Subay sa gipaguwang datos sa Philippine Institute of Volcanology and Seismology (Phivolcs), natala ang magnitude 6.4 nga linog alas 11:23 sa gabii. Tectonic ang origin niini mga natala 26 kilometros southeast sa lungsod sa Don Marcelino.

Ang pagtay-og nga aduna'y gilawmon nga 143 kilometros nakatala og mga intensities: Intensity V - General Santos City; Mati City; Intensity IV - Magsaysay, Davao del Sur; Koronadal City; Intensity III - Kidapawan City.

Gitataw sa Phivolcs nga nasinati sab ang mga instrumental Intensities: Intensity V - Alabel ug Malungon, Sarangani; General Santos City; Intensity IV - Koronadal City, ug Tupi, South Cotabato; Kiamba, Sarangani; Intensity III - Gingoog City; Intensity II - Bislig City; Intensity I - Cagayan de Oro City.

Giklaro sa Phivocs nga wa'y gilaumang damyos sa pagtay-og apan gi-alerto ang katawhan sa mga posibleng aftershocks nga mahitabo.

Samtang gidason ni Camoro nga sa kanunay naka-alerto ang ilang buhatan sa pagresponde sa bisan unsang emerhensiya.

Giawhag sab niini ang publiko nga kanunay'ng mag-igmat kay matag karon ug unya di matagna ang mga kalamidad. (Orlando B. Dinoy)


Source: Sun.Star Superbalita (https://www.sunstar.com.ph/article/1869462/Superbalita-Davao/Balita/M64-nga-linog-sa-Davao-Occidental-way-damyos?ref=rss&format=simple&link=link)

No comments