Recent Posts

Breaking News

Kapitan, mag-atubang og kaso nga administratibo


GAWAS sa kasong kriminal nga gipasaka, posibleng mag-atubang sab og kasong administratibo ang barangay kapitan ug kagawad nga nadakpan human nasakpang naglusad og sabong nga gidili ning panahona karon sa coronavirus disease (Covid-19) pandemic.

Giingong mga kaso sa maong mga opisyal sa barangay iduso ngadto sa Department of the Interior and Local Government (DILG)-Davao alang sa posibleng kasong administratibo nga ilang atubangon.

Nadakpan atol sa gilusad nga anti-illegal gambling sa San Pedro Police Station sila si Kapitan Marc Cayetano, 41, sa Barangay 10-A Poblacion ning siyudad sa Davao, ug Kagawad Romeo Mamontayo, 57, alas 2:30 sa hapon niadtong Dominggo, Sepyembre 6, didto sa Duha, San Rafael sa maong barangay.

Gawas sa mga nahisgutan, lain pang 27 ka mga tawo ang giapil og signit sa dihang naaktohan nga nagpahigayon og sabong sa giingong uma sa kapitan sa maong dapit.

Sumala pa nga sa wala pa ang operasyon, nakadawat na ang San Pedro PNP og reklamo gikan sa nagpakabana nga molupyo bahin sa sabong sa San Rafael Village.

Daling miresponde ang kapulisan sa maong dapit aron nga susihon ang impormasyon.

Sa dihang niabot sa lugar, nakamatikod ang mga operatiba og grupo sa mga tawo kinsa nagpahigayon og ilegal nga sabong hinungdan nga gipang-aresto ang mga nahisgutan.

Nakuha gikan sa lugar isip mga ebidensiya mao ang duha ka igsasabong nga manok, P245,734 sa nagkadaiyang denominasyon nga pusta ug 33 ka mga tari sa manok.

Mga nadakpan daling gihatud sa presinto alang sa dokumentasyon ug pagpasaka og kasong kalapasan sa Presidential Decree (PD) 449 isip giamenda nga PD 1602 ug Republic Act 11332 nga dunay kalambigitan sa Section 4, sa Executive Order 47-A sa lokal nga kagamhanan sa siyudad sa Davao.


Source: Sun.Star Superbalita (https://www.sunstar.com.ph/article/1869569/Superbalita-Davao/Balita/Kapitan-mag-atubang-og-kaso-nga-administratibo?ref=rss&format=simple&link=link)

No comments