Recent Posts

Breaking News

Gobernador mikwestiyon sa pamahayag sa doktor


TALIWA sa warning sa usa ka doktor sa Sugbo, giinsister ni Gobernador Gwendolyn Garcia nga walay nakitang pagdagsang sa kaso sa coronavirus disease 2019 (Covid-19) sa probinsya sa Sugbo.

Gikwestyon ni Garcia ang basehan sa pamahayag sa usa ka medical expert labot sa possibleng pagdagsang sa kaso sa probinsya tungod sa mas taas nga active cases niini kon itandi sa dakbayan sa Sugbo.

Ang gipasabot ni Garcia mao si Dr. Peter Mancao, tigpamaba sa Cebu Medical Society (CMS).

Atol sa press conference sa Kapitolyo kagahapon, Septiyembre 14, gitandi ni Garcia ang gihuptan nga datos sa Probinsya sa mga datos nga gipagawas sa Department of Health (DOH-7) sa dakbayan sa Sugbo.

Base sa datos sa Probinsya sa Septiyembre 13, nakatala kini og 583 ka aktibong kaso sa Covid-19 sa kinatibuk-an nga 5,053 ka mga positibong kaso.

Kon itandi sa kaso sa dakbayan sa Sugbo nga may 385 lang ka mga aktibong kaso sa kinatibuk-an nga 9,742 ka mga positibong kaso.

Mas taas ang aktibong kaso sa Probinsya kon itandi sa Dakbayan sa Sugbo.

Apan supak ang Gobernador sa pagbase sa pagdagsang sa kaso subay lang sa mga aktibong kaso.

Matod ni Garcia nga angay kwentahon ang population sa Probinsya aron makuha ang kinatibuk-ang porsyento sa mga nataptan sa Covid-19.

Subay sa swab test positivity rate nakatala og labing taas nga porsyento sa mga nag positibo ang dakbayan sa Mandaue nakakuha og 18.9 porsyento sa mga nagpositibo sa swab test.

Nikuha og 10.04 porsyento samtang ang dakbayan sa Lapu-Lapu nga nakakuha sa labing menos nga positivity rate nga anaa lang sa 6.1 porsyento.

Si Garcia misegunda sa pamahayag sa usa ka medical expert nga spokesperson sa Cebu Medical Society nga mi-warning sa mga Sugboanon sa posibleng pagsutoy sa Covid-19 sa probinsya.

Dili angayan nga moluwat og pamahayag ang giingong mga eksperto kon wala kini datos nga ikapapakita.

“Hayman ani ang surge? Ayaw pataka og sulti kay pa warning warning ka diha wa man gani ka nakatuyok sa probinsya. Giinsulto man nimo ang mga mayor nga naningkamot og maayo,” matod ni Garcia.

Dugang ni Garcia nga kon subayon usab ang 44 ka mga lungsod og unom ka mga syudad sa probinsya, 42 ka mga lungsod ang aduna pay aktibong kaso apan walo na ka lugar ang wala na makatala og bag-ong mga kaso.

Gipadayag usab sa Gobernador nga mas maayo nga mas hatagan niini og pagtagad ang dakbayan sa Sugbo nga maoy usa sa mga hinungdan nganong misulbong ang kaso sa mga nataptan sa covid sa probinsya sa Hulyo.

Nunot sa pagpaubos sa general community quarantine (GCQ) sa dakbayan sa Sugbo. (ANV)


Source: Sun.Star Superbalita (https://www.sunstar.com.ph/article/1870197/Superbalita-Cebu/Balita/Gobernador-mikwestiyon-sa-pamahayag-sa-doktor?ref=rss&format=simple&link=link)

No comments