Recent Posts

Breaking News

Gipatay sa mga ‘engkanto’?


“BARKO sa mga engkanto” gibasol sa mga residente sa kamatayon sa usa ka batan-on nga lalake nga nalumos samtang naligo sa Sayaw Falls niadtong Lunes sa buntag, Septiyembre 14, 2020 sa Brgy. Esperanza, lungsod sa Aloguinsan, Sugbo.

Si Kim Arila, 19, ulitawo, taga Brgy. Can-asujan, dakbayan sa Carcar, nakaplagan dihang nilutaw Miyerkules, alas 5:30 sa buntag, Septiyembre 16, sa mao nga dapit.

Si Police Senior Master Sgt. Solomon Cardoza, sa Aloguinsan Police Station nga nahinabi sa Superbalita Cebu, nagkanayon nga Miyerkulis sa alas 5:30 sa kadlawon, usa ka residente sa lugar ang nakakita sa lawas nga milutaw na duol sa dapit diin siya naunlod.

Ang lawas nabaho na ug nagsugod sa pagkadugta. Gituohan nga napasok kini sa mga bato sa ilawom sa tubig.

Si Arila uban sa iyang mga higala ug paryente nagtagay samtang nangaligo sa busay.

Apan misakay kini sa gakit nga kawayan sa iyang pag-adto sa lawom nga bahin sa linaw.

Si Geronimo Resurreccion, silingan, nakakita kang Arila nga ni-dive ug kalit lang nagkapakapa.

Tungod niini, dali sab siyang nisawom aron tabangon si Arila.

Sa iyang pagsawom, iyang nakuptan ang hawak apan gitulod siya pailawom.

Sa iyang pagtunga, nahibulong siya nga wala na kini niya makita hinungdan nga nisinggit siya og pakitabang sa iyang mga kauban nga si Arila nawala.

Ang mga higala nangambak sab ug ning tabang sa pagsawom aron pagpangita kang Arila, apan pakyas sila kay nalubog na ang tubig tungod sa uwan ug nisugod na sa pagbaha.

Gi-report nila sa barangay ang hitabo, hangtod nga nadawat sa kapulisan ang impormasyon nianang udto sa Lunes.

Uban sa mga sakop sa disaster ug rescue team sa lungsod, mipahigayon silag search and rescue operation pero pakyas gihapon.

“Ang sulti sa mga residente didto naa daw daghang mga engkanto nga nagpuyo diha. Duna daw barko sa engkanto diha, basin nadasmagan,” dugang ni Cardoza.

Dunay mga residente sa lugar nga mitambag sa grupo ni Arila nga di sila maligo kay hilan ang lugar.

Gisultihan sila nga di mokumpiyansa kay niadtong Dominggo sa gabii miserbato ang siren sa dakong barko sa may busay, pero wa silay nakita. Ang barko giingong gipanag-iya sa engkanta nga si “Maria Tang-an”.

Ang ubang mga residente nipasangil nga gitiawan sa engkanto si Arila kay gisabaanug gisamukan sa pagpangaligo.

Apan matod ni Cardoza nga aksidente ang hitabo ug nasipyat lang si Arila sa pag-dive.

Ang busay gikatahong lawom kay bisan usa ka bos nga kawayan di matugkad, unya sa ilawom dunay mga gagmay nga lukab. (GPL)


Source: Sun.Star Superbalita (https://www.sunstar.com.ph/article/1870438/Superbalita-Cebu/Balita/Gipatay-sa-mga-engkanto?ref=rss&format=simple&link=link)

No comments