Recent Posts

Breaking News

Flores, Ponsica nanumpa sa bag-ong katungdanan


NANUMPA na ang bag-ong mga opisyal sa Lungsod sa Barili atubangan kang Judge Leopoldo Cañete sa Lungsod sa Barili sa Lunes, Septiyembre 7, 2020.

Si Julito "Julie" Flores kinsa kanhi bise mayor mao na ang nihulip kang anhing Mayor Marlon Garcia samtang ang first councilor nga si Luisito Ponsica maoy milingkod isip bag-ong bise mayor.

Sa pakighinabi sa Superbalita Cebu kaniya, mibutyag si Flores nga iyang ipadayon ang mga proyekto nga nasugdan ni Garcia sa lungsod.

Naglakip na niini ang road concreting projects nga gisuportahan sa kagamhanan sa Lalawigan sa Sugbo, pagpalambo sa mga estruktura ug edipisyo sa pampublikong merkado ug sa munisipyo, pagpadayon sa turismo ug uban pa.

"Ato i-implementar ang mga nabiyaan niya nga projects nga gihandom niya para sa Barili. Unya karon wala pa kaayo tay nahuna-hunaan kay amo sa ilubong si Mayor . Unya by Monday anha na lang nya ta magsugod sa kon unsay dugang proyekto nato para sa katawhan sa Barili. Ako gyud ning ipadayon aron di sab siya magmahay nako," matod ni Flores.

Gitug-an sa mayor nga may ipatuman usab siya nga mga kausaban sa lungsod ug sa munisipyo atol sa iyang paglingkod.

"After 15 or inig ka 16, siguro naa tay gamay nga adjustment kay natural naa man gyud nay trust and confidence sa atong mga tawo. So, dunay adjustment, pero ganiha nagtigum sad ta sa mga tawo nga mga casual ug permanent, ato na ipabilin sa opisina pero ang kanang uban siguro, unya wa naman sad mo duty ang uban unya co terminous, nakasabot sad ko sa ilang bahin," dugang ni Flores.

Si Flores nakaserbisyo isip kapitan sa 2013, nahimong konsehal og usa ka termino ug sa 2019 isip bise mayor.

Bisan sa hinanali niya nga paglingkod isip mayor, gibutyag ni Flores nga wala pa maka recover ang tibuok lungsod sa sunod sunod nga panghitabo sa pamilyang Garcia nga nakaserbusyo og dako pinaagi sa pagserbisyo sa lungsod.

Tungod sa managlahi nga opinyon sa mga tawo, gihangyo ni Flores ang tanan nga maghiusa ug i-padaplin una ang pamolitika ning panahon sa pagbangutan sa lungsod.

"Ato sa ihikling ang politika, wa may election so magtinabangay ta. Akong hangyo ninyo. Ganiha nag meeting mi sa mga kapitan, hangyo sad ko nila nga inyo sad ko nga hatagan sa inyong respeto para mapadayon nato ang pag alagad ug pag serbisyo...magpabilin usab nga kalma nga dili magwatak watak na pod kay naghiusa man sad mi ni Mayor," matod ni Flores.

Isip pag hatag og respeto ug pahasubo sa nitaliwan nga mayor, naka half-mast usab ang bandera sa munisipyo sa lungsod.

Sa Sabado, Septiyembre 12, usa ka tribute ang ipahigayon sa conference hall sa munisipyo kon asa ihaya si Garcia.

Samtang sa Dominggo, Septiyembre 13, gikatakda nga ihatod na sa uwahing kapahulayan si Garcia diin giandam na usab sa lungsod ang mga bus nga kasakyan sa mga konstituente nga buot mohatod sa lubong./ANV


Source: Sun.Star Superbalita (https://www.sunstar.com.ph/article/1869496/Superbalita-Cebu/Balita/Flores-Ponsica-nanumpa-sa-bag-ong-katungdanan?ref=rss&format=simple&link=link)

No comments