Recent Posts

Breaking News

Edipisyo sa MCPO gitrabaho nag balik


GITRABAHO na og balik ang bag-ong building sa Mandaue City Police Office (MCPO) sukad nahunong niadtong Marso.

Ang maong building nasugdan og construct niadtong miaging tuig ug mahuman na unta niadtong Hulyo 31, 2020 apan tungod sa coronavirus pandemic, nahunong kini og pipila ka buwan.

Matod ni Police Colonel Jonathan Abella, city director sa MCPO, nga bag-o lang kini natrabaho og balik niadtong Septiyembre 13, 2020.

Nahunong ang konstruksyon sa maong tungod sa gipatuman nga community quarantine ug ang mga construction worker nipauli sa ilang tagsa tagsa ka mga probinsya.

Karon nga mamahimo na silang makabalik sa syudadm hinungdan nga nabalik na sab sila sa pag-construct, sigon ni Abella.

Dugang ni Abella nga tungod kay nabalik na ang pag-construct sa building, gitan-aw niya nga mahuman na kini hinapos sa tuig.

Kon ugaling mahuman na kining tulo ka andana nga building, ang mga opisina nga anaa sa headquarters mabalhin na sa maong building ingon man ang opisina ni Abella.

Gani, ang kuhaanan sa police clearance ibutang na sab sa groundfloor sa bag-ong building.

Ang building diin asa magkuha og police clearance himuon na kini nga parking lot, sigon ni Abella.

Dugang niya nga nakapananghid na sila ni Mandaue City Mayor Jonas Cortes nga himuon kini nilang parkinganan. (KFD)


Source: Sun.Star Superbalita (https://www.sunstar.com.ph/article/1870312/Superbalita-Cebu/Balita/Edipisyo-sa-MCPO-gitrabaho-nag-balik?ref=rss&format=simple&link=link)

No comments