Recent Posts

Breaking News

Dugang 2 ka pasilidad sa Covid-19 patients


ANG duha ka bag-ong pasilidad nga nahiluna sa Dakbayan sa Mandaue nga naa sa Norkis Park ug ang kanhi Cebu North Bus Terminal nangandam na sa pagdawat og mga pasyente.

Matod ni Ligaya Lakambini Dargantes, medical officer sa Covid-19 response sa Mandaue City, ang duha ka mga pasilidad andam na unta sa tunga-tunga sa Septiyembre.

Apan, atol sa ilang katapusang pag-inspeksyon sa mga pasilidad, matod ni Dargantes, nagpabilin sila sa pasilidad sulod sa duha ka oras, sa ilang naobserbahan alimuot ang mga kwarto bisan og aduna nay exhaust ug dagko nga electric fan.

“Even the patients are just asymptomatic, still we want to give them comfort when they are isolated,” ingon ni Dargantes.

Nadesisyonan nila nga mohangyo sa kagamhanan sa siyudad nga butangan og airconditioner ang mga kwarto sa duha ka bag-ong pasilidad.

Nagplano sila nga ang mga aircon nga giinstalar sa Mandaue City Central Isolation Unit ilang ibalhin ngadto sa duha ka pasilidad.

Sa higayon nga ma-install ang bentilasyon, magsugod na ang operasyon sa mga pasilidad.

Naglaum si Dargantes nga ang duha ka pasilidad magsugod na sa pag-abli sa hinapos sa Septiyembre. Niadtong Septiyembre 12, 2020, ang Dakbayan sa Mandaue nagtaho og 184 ka mga aktibo nga kaso sa coronavirus disease 2019 (Covid-19), 1,883 ka pasyente na ang nakarekober, ug 116 ang nangamatay.

Karon, ang Mandaue City Central Isolation Unit adunay 32 nga nahabilin nga mga pasyente sa Covid-19 nga na-quarantine sa pasilidad.

Giasoy ni Dargantes nga ang uban pang aktibo nga mga kaso nga wala nahimulag sa Mandaue City Central Isolation Unit gibutang ilawom sa home-quarantine ug ang pipila na-admit sa hospital. (KFD)


Source: Sun.Star Superbalita (https://www.sunstar.com.ph/article/1870103/Superbalita-Cebu/Balita/Dugang-2-ka-pasilidad-sa-Covid-19-patients?ref=rss&format=simple&link=link)

No comments