Recent Posts

Breaking News

COA: P913M husayunon sa Cebu City


ANG Cebu City Government gikinahanglan pang mohusay sa kapin P913 million nga balor sa mga transaction nga gisuspenso o gi-disallow sa tapos 2019, matod sa annual audit report sa Commission on Audit (COA).

Ang report, nga gipadala ngadto kang Cebu City Mayor Edgardo Labella, nagkwestyon usab sa 11 ka mga transaction sa 2019.

Hinuon, matod sa city administrator, kasagaran niini panahon pa ni kanhi mayor Tomas Osmeña.

Matod sa state auditors, P67,656,992 ang gipangsuspenso ug ang P845,574,748 nga gi-disallow pabiling wa mahusay hangtod sa Disyembre 31, 2019.

Ang suspensions mao ang mga transaction nga temporaryong gi-disallow samtang ang disallowances mao ang gipagawas nga kwarta nga napalgang illegal, irregular, wa kinahanglana o sobra ra kaayo.

Ang COA wa moila sa mga gigastuhan nga gikwestyon o wa gitugot.

Kon gisuspenso ug wa tugoti kinahanglan nga ang tawo nga responsable o dunay tulubagon kinahanglan motuman sa mga rekisitos o mobayad/mouli o bisan unsa nga pamaagi aron makalingkawas sa obligasyon suma sa nalatid sa balaud.

Matod sa report nga ang audit suspensions ug disallowances niabot og P158.534 million ug P845.19 million sa pagsugod sa 2019.

Sa mao nga tuig, dunay notices of suspension nga niabot og P10.77 million nga giluwatan samtang P845.19 million transactions nga temporaryong wa gitugot nasubay na, mao nga ang nahabiling balanse moabot na lang og P67.656 sa pagtapos sa tuig.

Duna say giluwatang disallowances sa P665, 062 nga transactions atol sa tuig samtang P280,792 ang nahusay, hinungdan nga P845.574 milyunes na lang ang nahabilin sa disallowances.

Samtang ang report milista sa mosunod nga mga kakuwangan sa 2019:

*Ang 21 ka garbage trucks nga balor og P147.7 million wa ma-record sa books of accounts sa Disyembre 31, 2019 bisan gi-deliver na sa mao nga tuig, hinungdan nga mas ubos na hinuon ang balor sa mga kabtangan ug natipon nga depreciation ug expense accounts.

Unom ka mga propiedad nga dunay net book value nga P41.5 million wa gi-derecognize sa accounting books bisan kon kini giguba na kay ang Department of General Services napakyas sa pag-submit sa kuyog nga mga dokumento ngadto sa City Accountant.

Mga edipisyo nga balor og P31.6 million nga gibalhin ngadto sa Department of Public Works and Highways Cebu City Engineering District wa gitala sa books of accounts nga nisangko sa kaubos sa balor sa property, plant and equipment (PPE) sa siyudad.

Mga resibo ug pagamit sa mga pundo gikan sa Philippine Amusement and Gaming Corp. gitala nga balayranan ngadto sa national government agencies (NGA) inay sa government owned and controlled corporation (GOCC) hinungdan nga nasobraan ang balance due ngadto sa NGA og P218.07 million ug understated ang due sa GOCC.

Mga pundo nga gipugngan nga balor og P43.156 million wa gi-remit ngadto sa Bureau of Internal Revenue, Government Service Insurance System, Pag-Ibig Fund ug PhilHealth. Ang kalangay sa remittance hayan mosangko sa mga penalty ug surcharges.

PANAHON NI OSMEÑA?

Ang kadaghanan sa wa mahusay nga P913 million disbursements sa Cebu City Government iya pa sa kanhi administrasyon, matod ni Cebu City Administrator Floro Casas Jr.

Matod ni Casas nga sagad sa isyu nagagumikan sa recording concerns.

Si Casas niingon nga ang Siyudad nagsuta kon unsa nga mga transaksyon ang wa pa ma-liquidate.

Ang Siyudad nitubag na sa COA human sa exit conference sa Pebrero, matod ni Casas.

Matod niya nga ang pag-ilis og administrasyon nakaapekto sa recording transactions.

Gihimo usab nga ehemplo ni Casas ang nadawat nga mga bus sa Siyudad nga gipalit sa miaging administrasyon.

“These are purchases sa time pa ni mayor (Tomas) Osmeña. These are inherited transactions. Pag-deliver sa atoa, wa pay OR and CR (official receipt and certificate of registration),” pagpasabot ni Casas.

“We cannot report this as an asset kay wa pa may OR and CR,” siya niingon.

Matod ni Casas nga ang mga rekomendasyon sa COA gipatuman na. (MVG, JJL)


Source: Sun.Star Superbalita (https://www.sunstar.com.ph/article/1869716/Superbalita-Cebu/Balita/COA-P913M-husayunon-sa-Cebu-City?ref=rss&format=simple&link=link)

No comments