Recent Posts

Breaking News

Chan: Way Covid patient sa Lapu


KATAPUSANG gisusi ang Lapu-Lapu City District Hospital sa Barangay Gun-ob human sa sa ARC Hospital sa Barangay Agus, nasuta nga wala nay pasyente sa coronavirus disease 2019 (Covid-19) sa dakbayan.

Kini ang gipahibawo ni Lapu-Lapu City Mayor Junard Chan.

Matod ni Chan, katapusang gipagawas sa tambalanan ang ilang Covid-19 nga pasyente niadtong Septiyembre 8, Martes, atol sa adlawng natawhan sa mayor.

Naglaom si Chan nga makab-ot sa dakbayan ang hingpit nga pagka Covid-free isip usab kabahin sa iyang birthday wish.

Sa kinatibuk-an moabot na lang sa 180 ka mga aktibong kaso ang kasamtangang natala sa dakbayan.

Ug kadaghanan niini mga asymptomatic nga mga pasyente nga anaa sa isolation facility samtang moabot lang sa 3 porsyento ang sintomas.

Dako kini nga kalamboan kn itandi sa milabayng mga buwan.

Dul-an 2,000 ka mga kaso sa Covid-19 ang natala sa dakbayan sukad niadtong Marso.

“It’s a birthday wish come true, thank you god for for this wonderful gift,” mensahe ni Chan iyang Facebook page.

Gisaulog sa mayor ang iyang adlawng natawhan kauban ang mga binilanggo sa Lapu-Lapu City Jail ug Homecare Center for Children sa Barangay Gun-ob niadtong Septyembre 8.

Sulod sa 30 ka tuig nga gibuhat sa mayor ang pagsaulog sa iyang birthday sa prisuhan aron makakaon og lamian ang mga binilanggo. (GCM)


Source: Sun.Star Superbalita (https://www.sunstar.com.ph/article/1869713/Superbalita-Cebu/Balita/Chan-Way-Covid-patient-sa-Lapu?ref=rss&format=simple&link=link)

No comments