Recent Posts

Breaking News

Chan: Lapu-Lapu dili madugay Covid-free na


MALAUMON si Lapu-Lapu City Mayor Junard “Ahong” Chan nga makab-ot unya sa dakbayan ang Covid-free status taliwa padayong nagkagamay sa mga coronavirus infection sa dakbayan.

Matod sa mayor nga gikan sa 50 ka mga kaso matag adlaw niadtong Hulyo, mas nius-os pa kini sa 10 ka mga kaso na lang matag adlaw karong Septiyembre.

Ang labaw nga nakapadasig kang Chan mao ang pribadong ospital sa dakbayan nga mao ang ARC Hospital sa Brgy Agus nga wa nay pasyente sa Covid-19 sa pagkakaron.

Katapusan silang mipa-checkout sa ilang pasyente sa Covid-19 niadtong Biyernes, Septiyembre 4.

Gawas niini, duha na lang usab ang na-admit sa Lapu-Lapu City District Hospital nga adunay Covid-19. Gikan usab sa 100 ka mga pasyente sa isolation facility sa Dakbayan, nius-os na usab kini ngadto sa 28 ka mga asymptomatic.

Dako ang pasalamat ni Chan sa mga nagpaluyo aron makab-ot ang kalampusan ug nanghinaot nga makalingkawas na ang dakbayan sa pandemya.

Mapasalamaton usab siya mga Oponganon nga mipatigbabaw ang ilang pagkadisiplinado niining panahona.

Sa uwahing talaan sa Department of Health DOH bulletin niadtong Septiyembre 6, aduna na lay 210 ka aktibong mga kaso sa Covid-19 ang dakbayan ug moabot sa 1,930 ang nakarekober samtang 91 usab ang nakalas.

“Dili ako kapoyon nga magpasalamat sa tanang frontliners, medical frontliners gikan sa pribado ug government agencies, apil na pod ang matag Oponganon nga mitabang og sanong sa atong mga mando ug tiunay migahin ilang oras pag-ampo nga mahuman kita sa atong kalbaryo ug labaw sa tanan salamat sa atong Labawng Makagagahom pag-ayo sa atong Covid patients ug pagprotehir sa kadaghanan,” matod ni Chan.

LAING GI-SWAB

Dugang 15 ka mga residente sa Purok Kwatro, Barangay Cubacub, Dakbayan sa Mandaue ang gi-swab test kaniadtong Sabado, Septiyembre 5, 2020.

Kini nga mga tawo mao ang second generation contact sa usa ka 50-anyos nga lalake nga namatay kaniadtong Agusto 25 nga human sa tulo ka adlaw nga haya niini , una pa nahibaw-an nga positibo sa Covid-19.

Adunay hapit 200 ka mga indibidwal ang nahimong persons under monitoring (PUMs), nga gipa-ilawom sa localized lockdown sukad niadtong Agosto 29, 2020. Adunay 48 ka mga pamilya o 30 ka mga panimalay ang apektado sa lockdown sa Purok Kwatro.

Sa pakighinabi sa Superbalita Cebu ni Sherwin Gogo, konsehal sa Barangay Cubacub ug tigpamaba sa Barangay Health Emergency Response Team (BHERTs), siya niingon nga ang 15 ka mga indibidwal nga gi-swab test adunay contact sa anak sa namatay kinsa nagpositibo sab sa virus.

Anak sa namatay gidala na sa Mandaue City Central Isolation Unit aron didto i-isolate.

Dugang ni Gogo nga nagpaabot pa sila sa resulta sa 15 ka indibidwal nga gi-swab.

Ang 15 ka mga indibidwal ug anak sa namatay wa pa usab magpakita og bisan unsang simtomas sa flu, matod ni Gogo.

Ang mga lockdown kit nga adunay sulod nga bugas, mga de lata, hygiene kit, ug uban pa nga kinahanglanon nga mga gamit gihatag na sa na-lockdown nga mga residente.

Sa pag-lockdown nila sa maong purok, matod ni Gogo, ubay ubay nga mga residente ang mga nireklamo labi na kadtong mga trabahante.

Apan, misabot na lang sila sa sitwasyon nila ug sa mga protocol nga gihimo sa lugar, matod ni Gogo. Sa laing bahin, niadtong Septyembre 7, 2020, gitaho sa Mandaue City Public information office Facebook page nga aduna nalay 198 aktibong kaso sa dakbayan.

Ang Dakbayan sa Mandaue gitaho sab nga adunay 11 ka bag-ong kaso sa Covid-19 kaniadtong Septiyembre 7, diin adunaa nay total nga 2,133 nga nakumpirma nga kaso sa Covid-19.

Aduna na usay 1,839 ka mga pasyente sa Covid-19 sa dakbayan ang nangaayo samtang adunay 102 kinatibuk-ang nangamatay. (KFD)


Source: Sun.Star Superbalita (https://www.sunstar.com.ph/article/1869481/Superbalita-Cebu/Balita/Chan-Lapu-Lapu-dili-madugay-Covid-free-na?ref=rss&format=simple&link=link)

No comments