Recent Posts

Breaking News

Caindec: 14 ka inspection centers tukuron sa LTO 7


ANG 14 ka mga Private Motor Vehicle Inspection Center (PMVIC) sa Central Visayas nga proyekto sa Land Transportation Office (LTO) 7 kauban ang ubang pribadong sektor mohatag na unya sa ilang serbisyo sa ngadto sa mga motorista sa Sugbo.

Ang 14 PMVIC sa Central Visayas mahimutang sa Cebu City (3); Lungsod sa Carcar (1); Dakbayan sa Mandaue (2); Dakbayan sa Naga (1); Dakbayan sa Danao (1); Lungsod sa Tagbilaran (1); Tubigon (1); Talibon (1); Dumaguete City (2); ug Bais City (1).

Gipahibawo ni Vic Caindec, ang LTO regional director,niadtong Septyembre 10, 2020 atol sa walk-thru sa PMVIC sa Rocket Cargo, Barangay Subangdaku, Dakbayan sa Mandaue, nga pito na sa 14 ka mga inspection center ang hapit na mahuman.

Gipakita ni Caindec, kauban ang tag-iya sa Rocket Cargo ug ubang mga operator sa PMVIC sa rehiyon kung unsa ang pamaagi sa inspection sa modernong pasilidad.

Matod ni Caindec nga nagpaabot pa ang Rocket Cargo sa Authority to Operate nga ipagawas sa Department of Transportation (DOTr).

Ang kontrata sa mga pasilidad molungtad sa lima ka tuig.

Kung wala pa ang pandemya, matod ni Caindec nga base sa ilang timeline nga sa hinapos sa tuig musugod ug operate ang maong mga pasilidad.

Ang inspection center sa Rocket Cargo adunay gilapdon nga 5,000 square meters nga mamahimong makaserbisyo sa mga sakyanan o motor.

Ang pasilidad naglangkob og upat ka mga linya, diin ang tulo nga mga linya alang sa mga de-motor nga sakyanan ug usa ka linya alang sa mga motorsiklo.

Ang bayad sa inspeksyon gilaraw nga mukabat ngadto sa P600 alang sa mga motorsiklo ug P1,800 alang sa mga awto.

Ang mudumala sa maong mga pasilidad mao ang mga pribadong sektor nga misanong sa maong proyekto gani ang Rocket Cargo ang mudumala sa pasilidad nga anaa sa Baranagy Subangdaku, Mandaue City.

Dugang pa niya nga ang mga resulta ug sertipikasyon nga ipagawas sa mga inspection center ngadto sa mga motorista, automatic na nga ihatag sab nila ngadto LTO 7.

Sa matag inspeksyon, molungtad ra ngadto sa 15 minutos pataas.

Ang inspeksyon maglakip sa pisikal nga pagsusi sa mga bahin sa sakyanan sama sa seatbelts, headlight, windows, trunk, machine, ug uban pa.

Ingon niini, susihon usab nila ang speedometer, ang break, ug uban pang mga eksaminasyon aron mapamatud-an nga ang awto o ang motorsiklo luwas ug walay depekto.

Kauban sa pasilidad, sumala ni Caindec nga magtukod sab og driving school sa maong pasilidad.

Pinaagi sa mga mga pasilidad ug bag-ong sistema, sumala sa Caindec makatabang kini sa pagkumbinser sa publiko nga ang mga transaksyon sa LTO dali lang ug dili nila kinahanglan nga mukuha og fixer. / KFD


Source: Sun.Star Superbalita (https://www.sunstar.com.ph/article/1869838/Superbalita-Cebu/Balita/Caindec-14-ka-inspection-centers-tukuron-sa-LTO-7?ref=rss&format=simple&link=link)

No comments