Recent Posts

Breaking News

Brgy. kagawad sa Talisaynon gipusil, patay


ALBUERA, Leyte - Patay ang usa ka barangay kagawad sa lungsod sa Albuera, Leyte human pusila sa wa mailhing mga amadong tawo sa Zone 5, Barangay Talisayan niadtong Sabado, Septiyembre 5, alas 8:50 sa buntag.

Giila ang biktima nga si Germias Polo, 45, kagawad ug residente sa Zone 5 sa Talisayan.

Nidangop sa kapulisan sa lungsod ang asawa sa biktima aron mangayog tabang sa nahitabo sa iyang bana.

Ang kapulisan sa lungsod pinangulohan ni Police Captain Alexander Alfonso ang dali miresponde.

Pag-abot sa mga pulis, ilang naabtan ang patayng lawas sa biktima nga naligo na sa iyang kaugalingong dugo.

Base sa inisyal nga imbestigasyon, ang biktima nagsakay sa iyang motorsiklo padung sa iyang piggery farmm.

Pag-abot sa lugar nga nahitaboan, duha ka tawo ang nag-atang na sa biktima ug gipamusil sa makadaghang higayon.

Nalukapa si Polo ug nahagba ug giduol sa mga responsable ug gipusil pag-usab isip panapos nga pagpusil sa biktima aron maseguro nga patay kini, sumala sa mga nakasaksi sa krimen.

Ang mga mamumuno, wala mailhi sa dapit, dali nga misibat sa wa matino nga direksyon human sa insidente sa pagpamusil.

Padayon pa usab ang gihimo nga imbestigasyon sa kapulisan sa maong krimen ug blanko pa karon bahin sa motibo sa mamumuno atol ning pagsuwat.

Hinuon, gisuay sa kapulisan ang tanang anggulo nga posibling motibo sa pagpamusil sama sa iyang trabaho sa barangay ug negosyo lakip ang pagtino sa mga personal nga kaaway. (JKDP)


Source: Sun.Star Superbalita (https://www.sunstar.com.ph/article/1869406/Superbalita-Cebu/Balita/Brgy-kagawad-sa-Talisaynon-gipusil-patay?ref=rss&format=simple&link=link)

No comments