Recent Posts

Breaking News

Boatmen, operators gipaandam ni Chan


GIPAUBOS sa swab test sa Kagamhanan sa Dakbayan sa Lapu-Lapu ang 300 ka mga boatmen ug motorbanca operators sa isla sa Olango.

Ang kalihukan gituyo isip tipik sa pagpangandam sa pagbukas sa turismo sa dakbayan sama sa island hopping.

Matod ni Lapu-Lapu City Mayor Junard “Ahong” Chan nga importante nga masigurong walay coronavirus disease 2019 (Covid-19) ang mga boatmen ug motorbanca operators sa dakbayan alang sa kasiguroan sa mga turista.

Libre ra ang naasoyng pagpa swab sa mga boatmen ug operators. Gawas niini, gipang-aporan usab sila sa kagamhanan og vitamins ug gikuhaan sa ilang blood type.

“Ato gyud ni gipangandaman nga before they do the island hopping secured gyud ang atong mga boatmen nga Covid-free,” matod ni Chan.

Si Grace Mary Carungay, City Epidemiological Surveillance officer, niawhag sa mga gipang swab nga di una mogawas sa ilang mga panimalay hangtod di mogawas ang resulta sa mosunod tulo ngadto sa lima ka mga adlaw.

Kon magnegatibo, tagaan sila og flu vaccine ug identification (ID) card aron pagmatuod sa mga turista nga sila walay Covid.

Kon mag positibo, sila i-admit sa Sta. Rosa Hospital sa isla sa Olango o ba kaha sa isolation facility sa Brgy. Gun-ob.

Sa di pa hingpit nga buksan ang turismo sa dakbayan, usa ka coastal clean-up ang pagahimuon sa kagamhanan karong umaabot Septiyembre 19.

“Mao man gyud ning atong puhonan ang crystal blue waters ug ang atong white sand mao nang mopahigayon ta og coastal clean-up,” matod ni Carungay.

Human sa clean-up mao na ang pormal nga pagbukas sa kadagatan sa dakbayan sa mga dumuduong.

Kinahanglan na hinuong magdala og snorkel ang ganahang mag island hopping sa dakbayan sanglit gidili na ang pagpahuwam niini.

Aduna hinuoy baligya ang mga motorbanca operators niini alang sa mga turista. (GCM)


Source: Sun.Star Superbalita (https://www.sunstar.com.ph/article/1870036/Superbalita-Cebu/Balita/Boatmen-operators-gipaandam-ni-Chan?ref=rss&format=simple&link=link)

No comments