Recent Posts

Breaking News

Biktima nailhan tungod sa Q pass


LALAKE napalgang patay niadtong Sabado sa gabii, Septiyembre 5, sa coastal road sa South Road Properties nga unang gikatahong gipusil subay sa nadawat nga impormasyon sa Command Center radio base sa Cebu City.

Si PSSgt Francel Buling sa Waterfront Police Station ug imbestigador sa kaso, niingon nga sa ilang pagsusi kauban ang mga personnel sa Scene of the Crime Operatives (Soco), walay nakita nga samad sa lawas sa biktima agi og pinusilan apan ila kining ipaubos sa pag-awtopsiya aron masuta ang posibleng gikamatay niini.

Matod ni Buling, ang biktima nailhan sa pangan nga si Dennis Bayaton ug molupyo sa Sityo San Roque sa Barangay Sambag 1, siyudad sa Sugbo.

Apan sutaon una nila sa barangay ang pamilya Bayaton kon siya ba gyud ang maong tawo tukma sa gidala nga quarantine pass.

“Dili pata makaingon nga mao na ba gyud ang pangalan sa kadtong napalgang patay. Kay kani baya ang Quarantine Pass pwede ra nga mahulman. Amo sang susihon,” pagpasabot ni Buling.

Dugang niini nga walay mga lama sa dugo palibot sa lawas sa biktima. Apan gituohang giatake sa sakit sa kasingkasing ang maong tawo nga igo lang nagpahangin diha sa sea wall sa baybayon sa SRP.

Tungod sa mingaw ang maong dapit sa kasamtangan, hinungdan nga wala kini mabantayi ug nahagbong sa ubos nga pulos mga kabatoan gikan sa iyang paglingkod sa sea wall. Ang biktima nagsul-ob og brown nga stripe nga t-shirt samtang dark blue nga shortpants.

Gihangyo ni Buling ang tagtungod nga moadto lang sa St. Francis Funeral Homes aron masuta kon mao ba gyud ang pangalan sa biktima. (BBT)


Source: Sun.Star Superbalita (https://www.sunstar.com.ph/article/1869405/Superbalita-Cebu/Balita/Biktima-nailhan-tungod-sa-Q-pass?ref=rss&format=simple&link=link)

No comments