Recent Posts

Breaking News

Banakon nitipi sa dalagita gitodas


KIDAPAWAN CITY -- Napatay sa mga sibilyan ang King Cobra (banakon) nga nakapaak-patay sa usa ka dalagita alas 2:50 sa hapon niadtong Lunes, Septiyembre 14, 2020.

Ang dalagita nga biktima mao si Angelina Francisco, 15, nagpuyo sa Barangay Noa, Magpet, North Cotabato.

Sumala pa nga nasiplatan sa mga silingan ang dakong banakon duol sa dapit nga gihiktan sa kanding hinungdan nga ila kining gitabangan sa pagpuspos hangtud nga napatay.

Kahinumdoman nga gisugo lamang ang dalagita sa iyang amahan sa pagkuha sa kanding nga gitugway unahan sa ilang balay gumikan kay hapit na mobundak ang ulan.

Sa dihang gikuha na sa dalagita ang kanding nga gihikot sa punoan sa kape, kalit lamang siya nga gipahit sa tuo nga paa sa banakon.

Miuli ang biktima nga nagdagan ug misinggit nga nangayo og tabang sa iyang ginikanan.

Gipatambalan sa albularyo ang biktima apan wala dayon madala sa balay tambalanan gumikan tua sila nagpuyo sa bukid.

Duha lamang ka oras ang milabay, namatay ang biktima gumikan sa pagkatag sa lala sa banakon sa lawas niini.

Nasayran nga daghan nang napatay nga molupyo sa maong probinsiya human mapaaki og bitin nga banakon, ilabi na kadtong nagpuyo sa tiilan sa Mount Apo.


Source: Sun.Star Superbalita (https://www.sunstar.com.ph/article/1870385/Superbalita-Davao/Balita/Banakon-nitipi-sa-dalagita-gitodas?ref=rss&format=simple&link=link)

No comments