Recent Posts

Breaking News

5 kapitan sa Davao Region gisuspende


LIMA ka mga kapitan sa Davao Region, apil sa 89 ka punong barangay sa nasud, gipailawom sa 6 ka bulan nga suspensiyon sa Department of the Interior and Local Government (DILG) tungod sa pagkalambigit sa anomaliya sa unang hugna sa social amelioration program (SAP) sa Department of Social Welfare and Development (DSWD).

Kini maoy gikompirma ni DILG spokesperson Undersecretary Jonathan Malaya.

Sa gipagawas nga pamahayag niadtong Sabado, nagmando si DILG Secretary Eduardo Año sa mga municipal/city mayors sa maong mga kapitanes nga ipatuman gilayon ang mando sa Office of the Ombudsman samtang ang rehiyonal ug field officers sa maong buhatan gimandoan sab nga iseguro ang hapsay nga pagpatuman sa mass suspension.

Mga kapitan sa Davao Region nga apil nga gipasuspende mao si Maria T. Te sa Barangay Manuel Roxas, Governor Generoso, Davao Oriental; Josephina Padillo sa Barangay Libertad, Bansalan, Davao del Sur; Aurora C. Benemerito sa Barangay Bangkal, Matanao, Davao del Sur; Noel V. Alo sa Barangay Mayo, City of Mati, Davao Oriental; ug Apolonio Toledo sa Barangay Harada Butal, Padada, Davao del Sur.

Nagpasalamat si Año ngadto sa buhatan sa Ombudsman tungod sa pag-aksiyon gilayon niini sa mga reklamo nga giduso sa DILG batok sa mga badlungon nga mga barangay opisyal, ug nagkanayon nga magsilbi kining higpit nga pasidaan ngadto sa tanang mga local government units nga bisan unsang anomaliya nga ilang gihimo di kini pasagdan sa departamento.


Source: Sun.Star Superbalita (https://www.sunstar.com.ph/article/1870262/Superbalita-Davao/Balita/5-kapitan-sa-Davao-Region-gisuspende?ref=rss&format=simple&link=link)

No comments