Recent Posts

Breaking News

5 ka kapitan sa Cebu gisuspenso


LIMA ka mga barangay kapitan sa Sugbo naapil sa 89 ka mga barangay executive sa nasod nga gipahamtangan og unom ka buwan nga preventive suspension sa Ombudsman tungod sa giingong anomaliya sa pag-apod-apod sa unang tranche sa Social Amelioration Program (SAP) fund.

Niini, nimando ang Department of the Interior and Local Government (DILG) sa mga mayor sa pagpatuman sa mando sa Ombudsman.

Ang mando sa pagsuspenso kanila usa ka lakang samtang gipasaka ang kaso sa iregularidad sa pag-apod-apod sa hinabang sa kagamhanan atol sa sayong bahin sa coronavirus pandemic.

Usa sa mga kapitan nagagikan sa Siyudad sa Sugbo, duha sa Dakbayan sa Mandaue, usa sa Talisay City ug usa sa lungsod sa Carmen.

Sa usa ka press release sa DILG, ang mga kapitan nga gipangsuspenso giilang mao sila si Basak San Nicolas, Cebu City Barangay Captain Norman Navarro; Patricio Soco sa Alang-Alang, Mandaue City; Ignacio Cortes II sa Barangay Centro, Mandaue City; Ulysses Raganas sa Barangay Linao, Talisay City; ug Zosima Rojo, Barangay Upper Natimao-an, Carmen, Cebu.

Si Navarro, dihang gikuhaan og reaksyon sa Sun.Star Cebu, niingon nga di pa siya makakomentaryo kay wa pa siya makadawat sa suspension order.

“Di pa ko katubag kay wa pa koy nadawat og communication regarding ani nga kaso,” matod ni Navarro.

Si Navarro usa sa tulo ka mga kapitan sa Cebu City nga gitumbok nga pasakaan og kaso tungod sa giingong anomaliya sa pag-apod-apod sa SAP fund nga tag P6,000 matag panimalay.

Si Navarro, niadtong Agusto, nanghimakak nga dunay anomaliya sa pag-apod-apod sa SAP sa iyang barangay gawas sa usa ka beneficiary nga sama kaniya og ngan.

Matod ni Navarro nga iya nang gipaatubang ang mao nga tawo sa mga imbestigador sa Criminal Investigation and Detection Group (CIDG) 7.

Sila usab si Soco ug Cortes wa motubag dihang gitawgan sa Superbalita Cebu.

Ang ilang mga phone nagsige lang og ring dihang gipangtawgan. Wa usab sila motubag sa text messages nga gipadala.

Samtang si manlalaban Eddu Ibañez, executive secretary ni Mayor Jonas Cortes, niingon nga wa pa sila makadawat og kamandoan alang sa pagpatuman sa suspension sa duha ka mga barangay kapitan.

“Good pm. We will be waiting for the official documents regarding the matter. As of the moment we have not received any. Thank you,” matod ni Ibañez sa iyang text message.

Sa rehiyon 7, dunay laing mga kapitan nga gipangsuspenso usab. Kini giilang sila si

Rodolfo Simbajon sa Barangay Guio-ang, Guindulman, Bohol; Mario Lamanilao sa Barangay Calituban, Talibon, Bohol; Eugene Zamora sa Barangay Taloto, Tagbilaran City, Bohol; ug Mercedita Uy sa Barangay Cancawas, San Jose, Negros Oriental.

Sa usa ka pamahayag sa Sabado, Septiyembre 12, 2020, si DILG Secretary Eduardo Año niingon nga iya nang gimandoan ang mga hingtungdang mayor sa mga lungsod ug siyudad sa pagpatuman sa mando sa Office of the Ombudsman kon ila nang madawat ang mando.

Ang mga rehiyonal nga buhatan sa DILG gimandoan usab sa pagseguro sa hapsay nga pagpatuman sa kamandoan.

Gipasalamatan usab ni Año si Ombudsman Samuel Martires sa dinaliang aksyon sa mga reklamo nga gipasaka sa departamento sa mga kapitan nga nakalapas.

Matod ni Año nga ang lakang usa ka higpit nga baud sa tanang local government units nga kon sila makahimog kahiwian, di sila pasagdan sa DILG.

“Naway magsilbing babala ang suspensiyon na ito sa iba pang mga lokal na opisyales. Ang katiwalian ay walang puwang sa ating pamahalaan lalong-lalo pa ngayong panahon ng pandemya,” siya nagkanayon.

Sa usaka mando nga gipetsahan niadtong Septiyembre 2, ang Office of the Ombudsman niingon nga lig-on kaayo ang ebedinsya batok sa mga barangay kapitan.

“The evidence on record shows that the guilt of these punong barangays is strong and the charges against them involve serious dishonesty, grave misconduct, abuse of authority and conduct prejudicial to the best interest of the service which may warrant removal from the service,” matod sa Ombudsman.

Matod sa Ombudsman nga ang pagpabilin sa mao nga mga kapitan sa ilang buhatan hayan makaapekto sa kasong gipasaka batok kanila. “[so] placing them under preventive suspension for a period of six months pursuant to Republic Act No. 6770 is proper under the premises.”

Si DILG Undersecretary ug DILG Spokesperson Jonathan Malaya niingon nga sa mando sa DILG, ang PNP CIDG nipasaka na og mga kasong criminal batok sa 447 ka mga tawo tungod sa paglapas sa Republic Act (RA) 3019 (Anti-Graft and Corrupt Practices Act), Republic Act (RA) 11469 (Bayanihan Act I), ug Republic Act (RA) 6713 (Code of Conduct of Government Officials and Employees) ug uban pa sa pagpatuman sa social amelioration. (REV, WBS, JJL, KFD uban sa PR)


Source: Sun.Star Superbalita (https://www.sunstar.com.ph/article/1870041/Superbalita-Cebu/Balita/5-ka-kapitan-sa-Cebu-gisuspenso?ref=rss&format=simple&link=link)

No comments