Recent Posts

Breaking News

4Ps ka mga pamilya sa backyard gardening


BISAN sa Covid-19 pandemic, ang mga pamilya sa Pantawid Pamilyang Pilipino Program (4Ps) sa Central Visayas nagpadayon sa pag-ugmad sa ilang garden nga nagsuporta kanila og pagkaon ug kinitaan.

Mimbalawag Family

Ang pamilya ni Judith Mimbalawag sa Brgy. Balidbid, lungsod sa Santa Fe nagpamatuod sa benepisyo nga makuha sa gardening.

“Makatabang pud ang gulayan sa pagpanalipod sa kalikupan tungod kay ang materials nga gigamit namo kay environment-friendly man sama sa natural fertilizers ug pag-recycle pinaagi sa paggamit sa plastic bottles isip sudlanan sa mga tanom,” matod ni Judith.

Siya nipaambit nga ang gardening kabahin sa ilang matag adlaw nga kalihokan uban sa iyang upat ka mga anak. Nananom sila og mgautanon, sibuyas, ahos, talong, luy-a, cabbage ug pumpkin. “Dako gayud ang natabang sa Pantawid sa among pamilya labi na sa pagpaeskwela sa among mga anak apan wala pud ta nagsalig mao nga maninguha ta sa atong trabaho ug kining pag-garden aron naa mi makuhaan sa among pagkaon,” dugang ni Judith.

Dili pa lang dugay, ang pamilyang Mimbalawag nakadawat og pag-ila isip municipal level winner sa SUGBUsog “Sugbuanong Busog, Luwas ug Himsog,” usa ka vegetable gardening contest sa Cebu Provincial Government.

Estorgio Family

Ang Estorgio family sa Brgy. Panghagban, lungsod sa Buenavista, Bohol nag-ugmad usab og garden nga gamit sa matag adlaw nga pagkaon.

Ang magtiayong Marcelo ug Clarita nakahukom nga motutok sa vegetable farming sa 2010 human nakadawat og lump sum cash nga P9,500. “Tungod sa pagkugi sa pagpananom, nakapaeskwela kami sa among mga anak. Naay nakahuman dressmaking sa TESDA (Technical Education and Skills Development Authority) ug nakahuman college sa Bohol Island State University (BISU) ug karun teller sa Palawan pawnshop,” matod ni Clarita. (PR)


Source: Sun.Star Superbalita (https://www.sunstar.com.ph/article/1870093/Superbalita-Cebu/Balita/4Ps-ka-mga-pamilya-sa-backyard-gardening?ref=rss&format=simple&link=link)

No comments