Recent Posts

Breaking News

3 nasikop sa anti-drug operations


TULO ang nadakpan sa duha ka managlahi nga anti-illegal drug operation sa mga ahente sa Drug Enforcement Agency (PDEA) 7 dakbayn sa Sugbo niadtong Martes, Septiyembre 8.

Pasado alas tres sa hapon sa naasoy nga adlaw sa dan Magallanes eskina dan Climaco sa Barangay Pahina San Nicolas, gihimo ang buy-bust.

Si IA 1 Jonard Cuiazon, nangulo sa operasyon, niila sa duha ka mga dinakpan nga sila Tom Villacarillo, 43, molupyo sa dan Tres de Abril, Barangay Labangon kinsa maoy target sa ronda.

Kuyog ni Villacarillo nga apil giposasan nga si Jesus Cecillo Sepe, 29, molupyo sa dan L. Flores, Barangay Pasil.

Nasakmit gikan sa duha nga shabu ang moabot sa 125 gramos sa shabu nga mobalor sa P850mil ang kantidad subay sa iyang Dangerous Drugs Board (DDB) value.

Si PDEA7 Regional Director Levi Ortiz sa pakighinabi sa Superbalita Cebu, niingon nga usa ka semana ang giumol sa iyang mga operatiba uban sa pag-monitor kang Villacarillo sa iyang kalihukan.

Dugang ni Ortiz nga si Villacarillo kanhi piniriso sulod sa 13 ka tuig sa kaso nga frustrated murder ug sa iyang paggawas, nisulod sa pagpamaligya ug paghatod og drugas.

Human sa kapin sa duha ka oras ang milabay, laing hugna sa pagronda ang gihimo sa laing grupo sa mga ahente sa PDEA 7 sa Green Village, Barangay Guadalupe.

Usa ka 23 anyos nga lalake nga gikonsiderar sa PDEA ug PNP nga top ten sa drug personalities ang nadakpan sa buy-bust.

Si IA1 Jessie Cabutotan, nangulo sa operasyon, niresulta sa pagka sikop kang Franz Edsan Gacasan 23, ug molupyo sa maong dapit.

Giposasan si Gacasan human masakmiti og drugas nga motimbang pg 105 gramos nga mokantidad sa P714,000 subay sa DDB Value.

Matud ni Cabutotan nga si Gacasan anaa sa ilang target lakip na sa PNP nga nalista sa ikanapulo nga sa ilang target list.

Nasuta usab nga si Gacasan dunay tulo ka mga kaso sa pagpanulis nga gipang atubang wala pay labot sa usa ka insidente sa pagpanulis sa dakbayan sa Mandaue.

Sa milabay nga buwan diin usa ka call center agent nga babae ang biktima niadtong tungora nabagnos sa dalan dihang gitulis kini nga miresulta sa iyang kamatayon. (BBT)


Source: Sun.Star Superbalita (https://www.sunstar.com.ph/article/1869714/Superbalita-Cebu/Balita/3-nasikop-sa-anti-drug-operations?ref=rss&format=simple&link=link)

No comments