Recent Posts

Breaking News

19-anyos gidunggab sa menor nga ig-agaw tungod sa komedya


USA ka menor de edad naputong ug nagdungab sa iyang ig-agaw nga construction worker nga nagsige og komedya kaniya, alas 7:30 sa gabii sa Dominggo, Septiyembre 6, sa Barangay Libertad, dakbayan sa Bogo.

Si Raymart Paduga, 19, ulitawo construction worker samdam sa toong bahin sa iyang lawas human mitaroy ang gunting.

Ang midungab kaniya ang ig-agaw nga 16 anyos kinsa wala makaagwanta sa ilang mga pasiaw.

Si Police Senior Master Sgt. Joel Pino, sa Bogo Poliice Station nga nahinabi sa Superbalita Cebu nagkanayon nga ang biktima uban sa ig-agaw mga higala diha sa usa ka sari-sari store sa ilang silingan.

Nagbayloay sa mga komedya hangtud nga napunta sa pag-initay sa duha.

Ang biktima gikatahong gisakitan sa ilang bawosbawos nga komedya hinungdan nga nagkalalis sa ig-gaw nga minor de edad.

“Napikon daw ning biktima, sige ingon nga lami-a pangitag sumbagay oy, lamia gyud sumbagayon,” dugang ni Pino.

Tungod niini ang minor de edad nga ig-agaw mibadlong sa biktima nga dili na magsigeg pasingit kay mga komedya lang ilaha.

Apan ang biktima gikatahong misampalong sa suspek hinungdan nga gikataw-an sa mga barkada hinungdan sa kasuko niini.

Mipauli ang suspek apan sa pagbalik, nagdala og gunting gihansakan ang tuong bahin sa dughan ang biktima.

Ang biktima gidala pagdali sa tambalanan sa Bogo.

Ang suspek nadakpan sa pagtubag sa alarma sa kapulisan apan gikostudiya sa Departmnt of Social Welfare and Development (DSWD) sa Bogo tungod sa iyang paka menor de edad pa.

Samtang, giandam na sa kapulisan ang kaso batok sa suspek. (GPL)


Source: Sun.Star Superbalita (https://www.sunstar.com.ph/article/1869478/Superbalita-Cebu/Balita/19-anyos-gidunggab-sa-menor-nga-ig-agaw-tungod-sa-komedya?ref=rss&format=simple&link=link)

No comments