Recent Posts

Breaking News

16-anyos gilugos


KIDAPAWAN CITY -- Mohatag og ganti si Kabacan Mayor Herlo Guzman, Jr. sa mga makatudlo ug makadakop sa mga suspek nga milugos ug mipatay sa usa ka dalagita alas 4 sa hapon niadtong Lunes, Septiyembre 14, 2020.

Giila ang biktima nga si Rasmiah Kumawir, 16, Grade 6 student ug nagpuyo sa Barangay Malanduague sa nahisgutang lungsod sa North Cotabato.

Sa taho gikan sa kapulisan sa Kabacan Municipal Police Station, sayo pa lang sa buntag milakaw ang dalagita aron mangahoy ug moadto sa balay sa iyang paryente.

Miabot na lang ang paniudto ug wala gihapon makauli sa ilang balay ang dalagita.

Nakit-an na lamang ang patay nga lawas sa biktima nga naglutaw sa sapa ug lagom ang liog nga posibleng gituok hinungdan sa iyang kamatayon.

Wala nay panty ang biktima ug nagkagisi-gisi ang iyang sinina.

Sa pagsusi sa kapulisan ug doktor, positibo nga gilugos ang dalagita unya gipatay ug gipaanod sa sapa.

Hugtanon nga gikondena ni National Commission on Muslim-Filipino Secretary Saidamen Pangarungan, North Cotabato Governor Nancy Catamco ug Kabacan Mayor Herlo Guzman, Jr. ang paglugos ug pagpatay sa dalagita.

Padayon ang giila sa mga pulis sa Kabacan Municipal Police Station ang suspek o mga suspek aron nga madakpan.


Source: Sun.Star Superbalita (https://www.sunstar.com.ph/article/1870384/Superbalita-Davao/Balita/16-anyos-gilugos?ref=rss&format=simple&link=link)

No comments