Recent Posts

Breaking News

132 ka pamilya nakadawat og hinabang


MGA pamilya sa tulo ka mga barangay sa Dakbayan sa Talisay nga nangaigo sa sunog nakadawat og mga hinabang pinansyal sa Miyerkules sa buntag, Septiyembre 16, 2020.

Mokabat sa 100 ka mga pamilya sa Barangay Tanke ang giaporan ni Talisay City Mayor Gerald Anthony “Samsam” Gullas Jr. og tag P10,000.

Samtang 30 ka mga pamilya sa Barangay Cansojong ug duha sa Tapul ang nakadawat og tag P5,000 gikan sa buhatan ni Senador Bong Go.

Si Gullas niingon nga ang naka eskidyul sa pag apud-apud sa cash financial assistance sa lokal nga kagamhanan mao ang Barangay Tanke.

Apan kay ang buhatan ni Go manghatag usab hinungdan nga giapil sa pagpaadto ang mga nasunogan sa Barangay Cansojong ug Tapul.

Matod ni Gullas nga nakadawat og financial assistance nga tag P10,000 kadtong sa mga pamilya sa barangay Tanke nga naugdaw ang balay.

Samtang tag P5,000 madawat nga hinabang sa mga tag-iya sa mga partially-damaged nga balay.

Samtang tag P5,000 ang madawat nga hinabang sa matag pamilya nga nasunogan sa Barangay Cansojong ug Tapul gikan kang Go.

“Dunay 100 sa Tangke, 30 sa Cansojong ug 2 sa Tapul ang modawat sa maong kwarta,” matod ni Gullas.

Una nang nakadawat og hinabang nga tag P10,000 gikan sa Siyudad ang mga nasunogan sa duha ka mga barangay.

Gawas sa tag P5,000 nga financial assistance gikan sa senador, nanghatag usab kini og relief goods sama sa bugas ug usa ka karton nga mga delata ug noodles.

Nanghatag usab ang senador og face shields lakip na ang 20 ka mga bisikleta nga gipa-raffle.

Usa sa mga nakadawat ug 10mil pesos ang senior citizen nga si Gliseria Venculado, taga Sityo Kilawan sa Barangay Tanke nga naugdaw ang balay.

Matod pa ni Venculado nga ang hinabang makadugang na materyales nga gamiton sa pagpabarog og balik sa ilang balay.

ABAG SA DT

Usa sa mga programa sa Department of Trade and Industry (DTI) pinaagi sa ilang Negusyo Center mao ang pagtabang sa gagmayng mga negusyante nga nawad-an og negosyo human nakasinati og kalamidad.

Matod ni Nelie Gacutan, developement specialist sa DTI nga nahinabi sa Superbalita Cebu, ang DTI-7 motabang sa mga negosyante nga nawad-an og negosyo human maigo sa kalamidad sama sa sunog.

Dugang ni Dagutan nga alang sa buot mo-apply sa gitanyag sa gobiyerno nga libreng kapital aron madugang sa ilang puhonan, kinahanglan nga ang ngalan naa sa Department of Social Welfare and Development (DSWD) masterlist nga nagpamatuod nga nasunogan ang usa ka aplikante. (BBT)


Source: Sun.Star Superbalita (https://www.sunstar.com.ph/article/1870428/Superbalita-Cebu/Balita/132-ka-pamilya-nakadawat-og-hinabang?ref=rss&format=simple&link=link)

No comments