Recent Posts

Breaking News

Virtual ang Bakasi sa Dinagat festival sa Cordova


TALIWA ning panahon sa pandemya sa coronavirus, mopadayon sa pagsaulog sa kapistahan ang lungsod sa Cordova sa Dominggo, Agusto 16, 2020, apan isibya na lang pinaagi sa intenet.

Kini ang kapistahan sa Bakasi sa Dinagat ug halad alang sa patron niini nga si Senyor San Roque.

Mao kini ang gipahibawo ni Cordova Mayor Teresa "Teche" Sitoy-Cho pinaagi sa ilang municipal page.

Ang lungsod sa Cordova nalakip na sa mga lugar nga gipaubos sa modified general community quarantine (MGCQ) isip ubos sa Lalawigan sa Sugbo.

Apan ubos sa kamandoan ni Cebu Governor Gwendolyn Garcia nga mao ang Executive Order (EO) 20 nga nag latid sa guidelines pagpaubos sa lalawigan sa MGCQ, gidili ang pagpahigayon og pista ug bisan unsa nga kalihukan: "Section 4, fiesta celebrations and all other related community activities during fiestas are also prohibited within the Province of Cebu."

Gipasabot ni Cho nga virtual kun ipaagi sa social media live broadcast ang mga kalihukan sa matag barangay aron kalikayan ang pagpundok.

"Akong tumong ug tuyo ra jud ani akong lakang kay mag-Halad ra jud para sa atong patron nga si Sr. San Roque kay igo ug sakto nga patron sa panahon karon sa pandemya. Nihangyo ang atoang simbahan ug kon pwede ba nga bisag halad nalang unta para sa atoang patron," matod ni Cho.

Ang lungsod mosaulog sa ika 156 nga kapistahan ni Senyor San Roque karon, Agusto 16, diin sa naandan mohalad gyud og sayaw ang mga konstituente niini.

Sa nahiusahan, usa ka misa ang ipahigayon online.

Sundan kini sa simultaneous kun dungan nga sayaw nga pagahimuon sa matag barangay, anha sa kapilya o barangay hall, nga isibya sa Facebook live.

May 13 ka mga barangay nga mo perform isip halad sa kapistahan nga may usa ka petition nga mao ang pagtapos na sa makalilisang nga coronavirus disease nga miresulta sa krisis.

Matag barangay, may 21 ka dancers kauban ang festival queen.

Gipasabot ni Cho nga aron malikay sa kagaw, gikinahanglan nga magsul-ob og facemask ang mga mosayaw ug may mga tanod usab nga ipakatap aron masiguro nga mag social distancing ang mga motan-aw.

"Busa, giawhag nako ang tanan jud unta nga barangay mo-present og halad not for the sake of prizes but pure intentions lang jud nato nga mo-ampo pinaagi sa paghalad og sayaw," matod ni Cho.

Gipahibaw sa lungsod nga way angay nga ikabalaka tungod kay recorded ang pagahimuon nga sayaw ug mao lang ang ipakita online pinaagi sa municipal page niini.

Malaumon si Cho nga pinaagi sa maong kalihukan, madungog ang pag ampo niini nga matapos na ang kalisod sa nasud gumikan niining Covid-19 pandemic. (ANV)


Source: Sun.Star Superbalita (https://www.sunstar.com.ph/article/1867051/Superbalita-Cebu/Balita/Virtual-ang-Bakasi-sa-Dinagat-festival-sa-Cordova?ref=rss&format=simple&link=link)

No comments