Recent Posts

Breaking News

Unang adlaw sa work pass ‘hapsay’


WAY nasugatang problema ang kapulisan sa unang adlaw sa pagpatuman sa paggamit sa WeTrace app sa Agusto 12, 2020.

Mao kini ang sayo nga feedback nga nadawat ni Cebu Police Provincial Office director Colonel Roderick Mariano gikan sa mga pulis nga nagdumala sa mga checkpoint sa mga utlanan sa Dakbayan sa Talisay ug Dakbayan sa Sugbo sa south ug Consolacion ug Dakbayan sa Mandaue sa norte.

Ang mga pulis nga nag-man sa nahisgutang mga checkpoint gipadad-an ni Mariano og Android phones aron mo-scan sa QR code sa app.

Ang kagamhanan sa Probinsya sa Sugbo niluwat og executive order alang sa mga nagpuyo sa mga lungsod nga kinahanglan nga mo download sa We Trace app sa ilang cellular phone isip kabahin sa work pass aron makasulod sila sa Dakbayan sa Sugbo kon motrabaho.

“Maayos pa naman ang ating pag che-check at tinitingnan na man ng ating mga kapulisan, lalong lalo na dito sa Talisay at dito sa ating Consolacion,” matod ni Mariano.

Ang kadtong way app kay way cellular phone nga magamit kinahanglan nga dunay certification o work pass gikan sa lungsod o siyudad diin siya nagpuyo isip hulip sa digital nga paagi.

Pasabot ni Mariano nga di mahimong makasulod sa siyudad sa Sugbo kadtong mga trabahante nga wa makaparehistro sa WeTrace app tungod kay maoy basehan nga wa matakbuyi sa coronavirus disease 2019 (Covid-19) ang trabahante.

Alang sa mga authorized person outside residence (Apor), mahimo ra silang makapakita sa ilang identification card sanglit nalakip sila sa exempted sa executive order ni Gobernador Gwendolyn Garcia.

“Hindi sila mapapayagan, wala naman bayad yung ating app. Walang bayad siya. You’ll just download lang. So alinsunod doon sa executive order, but those person na nasa Apor naman na pinapayagan ng Executive Number 20 ay papayagan natin basta makapakita lang sila ng kanilang mga IDs,” matod ni Mariano.

Si Police Brigadier General Albert Ignatius Ferro, direktor sa Police Regional Office (PRO) 7, sa iyang bahin, nagkanayon nga makig-alayon sila sa Kagamhanan sa Lalawigan alang sa pagpatuman sa WeTrace app tungod kay mahimo kining magamit alang sa contact tracing.

Lakip na ang pagpanghatag sa working pass alang niadtong mobalik sa pag trabaho sa dakbayan sa Sugbo aron mahimong hapsay ang duha ka lokal nga kagamhanan ug ma monitor ang tanang gipatuman nga lagda nunot ning nagpadayon nga kaso sa Covid-19.

“I think we should coordinate. Everybody should coordinate para we will be able to monitor everybody. It should not only be the Province doing their initiatives. It should be a holistic collaborative initiatives for all the local government units para dili ta magsagol-sagol and we have a unified system,” matod ni Ferro.


Source: Sun.Star Superbalita (https://www.sunstar.com.ph/article/1866760/Superbalita-Cebu/Balita/Unang-adlaw-sa-work-pass-hapsay?ref=rss&format=simple&link=link)

No comments