Recent Posts

Breaking News

Tatay, 3 anak natumbahan og kahoy


KIDAPAWAN CITY -- Patay ang amahan sa tulo ka mga anak human maipit sa nahagsa nga dakong punoan sa kahoy alas 10:20 sa gabii niadtong Huwebes, Agosto 20, 2020, atol sa pagbundak sa ulan ug kusog nga hangin.

Namatay mao si Edwin Bayawan, samtang tulo niya ka mga anak nga naangol mao sila si Jessie, 23, Jerome, 24, ug Jigger, 15, mga molupyo sa Barangay Ilomavis, Kidapawan City.

Nasayran gikan kang Kidapawan City Disaster Risk Reduction and Management Office (CDRRMO) Officer Psalmer Bernalte nga nakahukom ang mga biktima nga didto mangatulog sa balay sa ilang uma sa Magpet sa North Cotabato.

Samtang nangatulog nianang pagkagabii sa maong adlaw, mibundak ang ulan dungan sa makusog nga huyop sa hangin. Apan wala damha nga natumba ang dakong punoan sa Lawaan ug nahagsa sa ilang balay nga gikatulgan.

Patay on the spot si Edwin nga naipit sa natumba nga Lawaan. Ang tulo niya ka mga anak gihatud ngadto sa balay tambalanan ug giingong naa sa talandugon nga kahimtang samtang gisuwat ning balita.

Nagpasidaan ang lokal nga panggamhanan sa Kidapawan City ug Magpet sa mga namuyo kilid sa bukid ug sapa nga mag-amping kanunay ilabi na panahon sa ulan kay peligro kini sa pagdahili sa yuta, baha ug pagkatumba sa mga punoan sa kahoy.


Source: Sun.Star Superbalita (https://www.sunstar.com.ph/article/1867693/Superbalita-Davao/Balita/Tatay-3-anak-natumbahan-og-kahoy?ref=rss&format=simple&link=link)

No comments