Recent Posts

Breaking News

Tari-tari sa 2 managlahing lugar gironda


DAVAO DEL SUR -- Human misiyagit og "meron" o "wala" ang mga sabungero sa duha ka mga lungsod ning probinsiya, selda ang ilang napadulngan dihang naabtan sa kapulisan nga nagpahigayon og ilegal nga tari-tari sa manok niadtong Dominggo, Agosto 17.

Unang gironda sa Sulop Municipal Police Station ang tari-tari didto sa Purok 1, Brgy. Roxas, Sulop, alas 12:40 sa udto.

Nasikop ang mga suspek nga sila si Lito Mijoy Jailo, 40, ug Selbano Mirontos Fiel, 62, pulos minyo, molupyo sa Purok 5, Brgy. San Pedro, silingang lungsod sa Kiblawan.

Apan wa masikop ang tag-iya sa luna diin gihimo ang sabong human paspas kining nakasibat palayo sa lugar.

Gitanggong sa kapulisan ang usa ka way plakang SkyGo, kolor pula nga Honda Bravo ug kolor itom nga Honda TMX nga mga motorsiklo.

Narekober sab ang upat ka mga buhing manok panabong, duha ka bihag, mga bulang nga gigamit sa tari-tari isip ebidensiya alang sa ipasakang kaso sa mga suspek.

Samtang sa silingang lungsod sa Hagonoy, gironda sa kapulisan ang pasabong didto sa Purok 5, Brgy. Lanuro, ala 1:30 sa hapon sa samang adlaw.

Sa tahong gipaguwa sa Hagonoy Municipal Police Station, nasikop ang barbero nga si Ariel Angleas Tubli, 44, ulitawo, molupyo sa Brgy. Tacub sa lungsod human naabtan sa kapulisan ug nakuha ang duha ka buhing manok panabong.

Gihikay na sa duha ka police station ang kasong paglapas sa Presidential Decree 1602 kun Illegal Cockfighting Law, Article 151 sa Revised Penal Code ug Republic Act 11332 kun Act on Mandatory Reporting of Notifiable Diseases and Health Events of Public Health Concern batok sa mga suspek. (OBD)


Source: Sun.Star Superbalita (https://www.sunstar.com.ph/article/1867309/Superbalita-Davao/Balita/Tari-tari-sa-2-managlahing-lugar-gironda?ref=rss&format=simple&link=link)

No comments