Recent Posts

Breaking News

Tag-iya sa P81M shabu nakaipsot, gikiha


SHIPPER ug consignee sa P81.6 milyones nga illegal nga drugas nga nasakmit sa Philippine Drug Enforcement Agency 7, nga giabagan sa Police Regional Office (PRO) 7 niadtong Sabado, Agusto 15, gipasakaan nag kaso sa korte.

Kasamtangan wa nganli ang mga suspek tungod sa nagpadayon pa nga follow-up operations sa mga awtoridad.

Matod ni PDEA-7 Director Levi Ortiz nga nag atubang na og kasong may kalapasan sa Republic Act 9165 kun Dangerous Drugs Act of 2002 nga walay pyansa nga gitugot ang korte.

“Katong shipper ug recipient identified na nato. So right now, as we speak, we are filling appropriate criminal case against them for distribution and delivery of illegal drugs. So, non bailable offense na siya,” matod ni Ortiz.

Dugang ni Ortiz nga adunay nakuha nga mga address ang PDEA-7 sa ilang pagsusi sa dokumento.

Sa dihang ilang gisusi ang ngalan sa gipadalhan, nalakip kini sa ilang watch list nga nalambigit sa illegal nga drugas.

Nagtuo sila nga adunay spotter ang gipadalhan sa kargamento. Sa dihang nabantayan sa mga awtoridad ang kontrabando nga gipadala sa usa ka courier, nipahibawo dayon kini sa consignee nga nasakpan ang drugas hinungdan nga sa ilang pag adto sa balay niini, wala na nila maabti pa.

“Right after the discovery of the 12 kilos, ato dayon nga gipaadtoan og agents ang iyang balay pero wala na siya didto,” dugang ni Ortiz.

Nakig-alayon na ang PDEA 7 sa ilang counterpart sa National Capital Region diin naka address ang nag padala sa maong mga kargamento aron matino kon tinuod ba ang ngalan nga nakabutang sa dokumento niini.

Wa usab wad-a sa PDEA ang posibilidad nga adunay contact sa mga nagtrabaho sa courier company ang nipadala nga mao usab karon ang ilang subayon pinaagi sa ilang imbestigasyon.

Una nang mipahibawo si Ortiz nga gikan sa gawas sa nasud ang supply sa illegal nga drugas tungod sa packaging niini nga gisulod sa tea bag ang kinilo nga illegal nga drugas.

PASALAMAT

Gidayeg ug gipasalamatan ni Mayor Edgardo Labella ang Philippine Drug Enforcement Agency (PDEA)- 7 labot sa ilang malampuson nga operasyon pagsakmit sa dul-an 13 kilos nga shabu sa pantalan.

Ang mayor nagkanayon nga taliwa sa pagtutok sa City Government batok sa Covid-19, wa magpalipat ang PDEA ug ilang nakuha ang shabu balor og P81.6 milyones.

Si Labella nipadala og suwat ngadto kang RD Levi Ortiz sa PDEA 7 aron pormal nga ipadangat ang iyang commendation letter ngadto sa mga personnel sa maong buhatan.

“First and foremost, I would like to extend my sincerest congratulations to the PDEA VII and personnel under your leadership, for your unrelenting fight against the illegal drug menace,” tipik sa suwat ni Labella.

Ang mayor nagkanayon nga wa molugak ang PDEA 7 sa ilang trabaho taliwa sa problema nga giatubang sa gobyerno batok sa pandemia dala sa coronavirus disease 2019 ug wa makaipsot ang mga dautang elemento.


Source: Sun.Star Superbalita (https://www.sunstar.com.ph/article/1867410/Superbalita-Cebu/Balita/Tag-iya-sa-P81M-shabu-nakaipsot-gikiha?ref=rss&format=simple&link=link)

No comments