Recent Posts

Breaking News

Siquijor dili na Covid-free


NAWAGTANG ang Covid-free status sa lalawigan sa Siquijor human duha ka locally stranded individuals (LSIs) ning-abot gikan sa Manila ug nasuta nga positibo sa Sars-CoV-2, ang virus nga hinungdan sa Covid-19.

Si Siquijor Provincial Governor Zaldy Villa nipahibalo niini sa official Facebook page sa Probinsiya, Dominggo, Agusto 2, 2020.

“Among gikasubo sa tanan nga naay nakasulod nga Covid-19 positive sa atong isla. Kini, bisan pa tuod sa atong pagpaningkamot sa hugot nga pagpatuman sa health protocols,” matod ni Villa.

Sa duha ka mga kaso, usa taga lungsod sa Lazi ug laing taga lungsod sa Larena.

Ang mga ngan sa duha pulos gipugngan una karon sa gobernador.

Si Villa, hinuon, nipasabot nga walay local transmission sa sakit sa pagka karon.

“Kasamtangang gipatuman na sa atong mga medical front liners ang mga tukmang paagi, aron mahiulian ug aron dili mokaylap ning Covid-19 virus sa ubang Siquijudnon,” dugang niya. Siya nanawagan sa katawhan sa Siquijor sa pag-ampo alang sa kaluwasan sa ilang frontliners ug Siquijudnons sa kinabuk-an.

Lakip sa iyang panawagan mao ang pagsabot sa mga nasakit niini ug pagtahod sa ilang katungod isip tawo ug niawhag sa pagsunod sa health protocol. (WBS)


Source: Sun.Star Superbalita (https://www.sunstar.com.ph/article/1865689/Superbalita-Cebu/Balita/Siquijor-dili-na-Covid-free?ref=rss&format=simple&link=link)

No comments