Recent Posts

Breaking News

Rekisitos sa mga telco tower gimub-an


GIPAMUB-AN sa kagamhanan ang pagkuhag permits sa mga telecommunication company alang sa pagtukod og mga cell tower.

Ang Department of the Interior and Local Government (DILG) nipahibawo nga inay unom ngadto sa pito ka mga buwan ang pagkuhag permits gikan sa kagamhanan, karon di na maabtan sa usa ka buwan.

Ang lakang gihimo human si Presidente Rodrigo Duterte nimando sa pagpalambo sa imprastraktura sa digital sa nasod sa iyang State of the Nation Address (SONA).

Iyang gihatagan og deadline ang mga telco hangtod sa Disyembre sa pagpalambo sa ilang serbisyo aron di kuhaon sa kagamhanan ang ilang frequency.

Sa ilang tigom uban kang Duterte, si DILG Secretary Eduardo M. Año nitaho kang Duterte nga ang DILG, Anti-Red Tape Authority uban sa nasudnong mga ahensya niisyu og joint memorandum circular nga nagtibhang sa mga dokumentong girekisito ug paghikay sa building permit applications sa shared passive telecommunications tower infrastructure nga mas nailhan nga komon nga telecommunications towers.

“Dati po inaabot ng 200 days yung pag-apply ng permit. Dito po sa bagong JMC namin kasama ang lahat ng ahensya at mga local government units (LGUs), sabay-sabay na ang pag-process, makukuha po lahat ng permit in less than a month,” nipasabot si Año.

Duna nay gipangtang nga rekisito gikan sa naandan kaniadto aron mas mapadali.

“Dati po kailangan ng home owners association resolution, kailangan pa ng sangguniang bayan resolution, ngayon, wala na po 'yan. Di na po ‘yan kailangan. Lahat po ng steps na nagpapabagal sa proseso ay inalis na natin,” siya nidugang.

Nagtuo si Año nga karon matubag na sa mga telco, Globe Telecom, PLDT/ Smart Communications ug Dito Telecommunity Corp., ang yangongo sa publiko sa pagpalambo sa ilang serbisyo ning panahon sa coronavirus disease (Covid-19) pandemic.

Naglaum si Año nga pahimudsan sa mga telco ang JMC.“I hope they take this golden opportunity to further improve their service to the public,” dugang niya.

Gawas sa DILG ug ARTA, ang JMC gipirmahan usab sa Department of Information and Communications Technology; Department of Human Settlements and Urban Development (DHSUD); Department of Public Works and Highways; Civil Aviation Authority of the Philippines; Department of Health; ug Food and Drug Administration.

“Sinisigurado po namin na ang mga LGU at ang mga ahensiya ay susunod mga pamantayan na mas mabilis na pag-proseso ng licences, permits at saka clearances,” siya niingon. Kon unsa lang ang nakalatid nga rekisito sa JMC, mao lang kini ang sundon. (REV gikan sa PR)


Source: Sun.Star Superbalita (https://www.sunstar.com.ph/article/1865587/Superbalita-Cebu/Balita/Rekisitos-sa-mga-telco-tower-gimub-an?ref=rss&format=simple&link=link)

No comments