Recent Posts

Breaking News

QR pass gikinahanglan pa sa Cebu City


ANG pagkabalido sa 178,000 ka QR coded quarantine passes sa Dakbayan sa Sugbo gilugwayan bisan sa paglugak sa quarantine restrictions.

Sa Executive Order No. 086 nga giluwatan ni Cebu City Mayor Edgardo Labella sa Hulyo 31, ang quarantine pass gikinahanglan gihapon alang sa pagpalit sa mga gikinahanglan ug mga serbisyo.

Matod ni Labella nga ang pagpatuman sa quarantine pass gikinahanglan gihapon nga magpadayon sud sa dugang mga adlaw o semana.

Si Labella niingon nga iya unang obserbahan ang lihok sa katawhan sa di pa siya molibkas sa quarantine pass.

"Ato una'ng tan-awn ang movement ug attitude sa katawhan og mosunod ba gyud," matod ni Labella sa interview sa sibyaanang dyLA.

Niadtong Mayo, si Department of the Interior and Local Government (DILG) Secretary Eduardo Año niingon nga ang mga mayor makahukom kon gikinahanglan ba sa mga residente ang paggamit sa quarantine pass ubos sa GCQ status.

Molibkas lang si Labella sa passes kon iyang makita nga dunay kalamboan sa coronavirus disease (Covid-19) cases sa siyudad ug lihok sa mga residente.

"Kon mo-menus na gani'g maayo, kon makita nato nga mura'g disiplinado, kon atong matan-aw nga di na kailangan magamit, ato nang tangtangon," siya niingon.

Sa iyang EO, exempted hinuon ang authorized persons outside residence (APOR) gikan sa quarantine pass policy.

Ang quarantine pass holders gitugtang makagawas gikan sa alas 5 sa buntag ngadto sa alas 10 sa gabii.

Ang quarantine passes nga dunay code nga nagtapos sa odd numbers (1, 3, 5, 7, 9) gitugtang makagawas sa Lunes, Miyerkules ug Biyernes samtang ang nagtapos sa even numbers (2, 4, 6, 8, 0) makagawas sa Martes, Huwebes ug Sabado.

Sa Dominggo, way gitugtang makagawas, gawas lang sa gikonsiderar nga mga Apor.

Ang Siyudad sa Sugbo gipaubos sa GCQ gikan sa Agusto 1 ngadto sa 15.

Ubos sa GCQ, dugang mga establisemento ang gitugtang nga maka-operate. (JJL)


Source: Sun.Star Superbalita (https://www.sunstar.com.ph/article/1865591/Superbalita-Cebu/Balita/QR-pass-gikinahanglan-pa-sa-Cebu-City?ref=rss&format=simple&link=link)

No comments