Recent Posts

Breaking News

Purok giatake og Covid; gi-hard lockdown


MOIHAP sa 65 indibiduwal sa Barangay Kap. Tomas Monteverde Sr., sa Adgao District, Davao City ang gipabakwit ug gidala sa temporary treatment and monitoring facility (TTMF) human sa pag RT-PCR test kanila ug migula nga positibo sa coronavirus disease (Covid-19).

Tungod sa hitabo, sugod sa ala una sa hapon kagahapon, Lunes, Agosto 17, 2020 gipailawom sa hard lockdown ang Purok 8 sa maong barangay gumikan kadaghanan sa 65 ka mga nagpositibo gikan sa maong purok.

"Please be informed that the response group of the Davao City Covid-19 TF has initiated a hard lockdown of PUROK 8 of Brgy. Tomas Monteverde 1:30 pm today, August 17, 2020. This is to preempt possible massive spread of the infection in the area due to confirmed positive cases," tipik sa impormasyon gikan sa City Information Office (CIO).

Nagpahimangno ang lokal nga kagamhanan sa Davao nga likayan ang pag-adto sa nasampit nga barangay aron dili matakdan sa virus.

"Nobody can go in or go out except atong mo-adto'g hospital, or it’s an emergency. In terms of food, ang atoang CSWDO ang sa kanang mga grocery items. Ang City Vet ug City Agri will support with fresh produce nga mga pagkaon," matud ni Mayor Sara Duterte-Carpio sa pag-imposar sa hard lockdown sa nahisgutang Purok 8.

Hinuon dili tibuok barangay ang gi-lockdown di susama sa nahitabo sa Barangay 23-C, Isla Verde diin niadtong unang semana sa Hulyo gipailawom sab sila sa hard lockdown.

Sa talaan sa DOH-Davao, ang Barangay Tomas Monteberde adunay 34 ka mga kaso nga aktibo gikan niadtong Agosto 15, 2020.

Ang unang kaso sa maong barangay natala niadtong Agosto 1, 2020 kinsa mao kini si DR-1317, usa ka 56-anyos nga lalaki diin asymptomatic sa iyang kahimtang.

Sa Davao City duna nay dul-an 400 ka mga aktibong kaso sa Covid-19 samtang paspas sab misaka ang ihap sa mga naka-rekober matag adlaw.


Source: Sun.Star Superbalita (https://www.sunstar.com.ph/article/1867312/Superbalita-Davao/Balita/Purok-giatake-og-Covid-gi-hard-lockdown?ref=rss&format=simple&link=link)

No comments