Recent Posts

Breaking News

Prisohan, bus bust giandam sa CCPO


Giandam sa Cebu City Police Office (CCPO) ang ilang mga prisohan ug bus bust sa pagsugod sa higpit nga pagpatuman sa Cebu City Ordinance 2566 nga magpahamtang og dagkong mga multa sa makalapas sa mga quarantine protocol.

Matod ni CCPO officer-in-charge Police Colonel Josefino Ligan nga kon kaniadto ang mga molapas sa minimum health standard igo lang dakpon ug palimpyohon sa kadalanan, sugod karong adlaw, sila mahimo na nga mapriso sulod sa 30 ka adlaw kon naa na sa ikatulong paglapas.

Sa unang paglapas, ang masikop pamultahon og P1,500; sa ikaduhang paglapas P2,000 samtang sa ikatulo P3,000 o pagkabilanggo hangtod sa 30 ka adlaw agad sa hukom sa korte.

Lakip sa ilang dakpon kadtong wa motuman sa social distancing sa sud sa saklyanan ug panagtapok.

Ubos sa general community quarantine (GCQ), gidili ang panagtapok sa mga tawo nga mosobra sa 10, base sa executive order ni Cebu City Mayor Edgardo Labella.

“Harsh gyud siya. Bug-at gyud siya. Gituyo ni para maedukar gyud ang mga tawo nga dili na gyud magpabadlong kabahin aning non-wearing of face mask, kanang social distancing,” matod ni Ligan.

Ang tumong ug tuyo niini, matod ni Ligan, aron magmatngon ang mga Sugboanon sa pagtuman sa minimum health standards tungod kay naa pa ang kaso sa coronavirus disease sa siyudad sa Sugbo.

FACE SHIELD DI APIL

Samtang di pa usab mopatuman sa pagdakop ang kapulisan niadtong mga trabahante nga mobalik na sa ilang trabaho nga wa mosul-ob sa ilang mga face shield.

Ang Department of Labor and Employment (DOLE) mipagawas og kamandoan sa tanang mga kompaniya pagpugos sa ilang mga trabahante sa pagsul-ob og face shield isip kabahin sa gipatuman nga health protocol.

Gipasabot ni Ligan nga ang ilang buhaton mao lang ang pagbadlong nga tumanon ang mando sa Dole.

Di pa mahimo nga manakop ang mga pulis tungod kay walay ordinansa ang dakbayan sa Sugbo labot sa face shield.

Apan sugod usab karong adlaw, ang mga pasahero nga mosakay sa pampublikong mga sakyanan gimandoan sa pagsul-ob face shield, gawas sa face mask.

Kadtong di magsul-ob, di mahimong pasakyon.

Ang Land Transportation office motabang pag-monitor sa pagpatuman sa mando sa Department of Transportation (DOTr).


Source: Sun.Star Superbalita (https://www.sunstar.com.ph/article/1866995/Superbalita-Cebu/Balita/Prisohan-bus-bust-giandam-sa-CCPO?ref=rss&format=simple&link=link)

No comments