Recent Posts

Breaking News

Niño: Hustisya nakab-ot, pagkasikop ni Ecleo pagbuot sa Ginuo


“SA pila ka years nga gusto namo makab-ot ang hustisya sa iyang (Alona Bacolod) kamatayon, dili lang niya, but sa uban namong pamilya, among mga igsuon, karon totally, nakab-ot na gyud. Bisa’g sakit kaayo nga dili na mobalik diri, at least, nahatagan mo og hustisya.”

Pulong sa SunStar Cebu ni Niño Bacolod, 42, manghod sa gipatay nga si Alona Bacolod-Ecleo, asawa ni Ruben Ecleo, Jr., kinsa nagtagotago human nakombikto sa pagpatay sa asawa apan nasikop na sa kapulisan.

Matod ni Niño, naglakaw siya pauli sa ilang balay gikan sa trabaho, alas 5:30 sa hapon niadtong Huwebes, Hulyo 30, dihang nasayod gikan sa usa ka higala nga si Ecleo na nasikop sa kapulisan nianang buntag sa samang adlaw.

Matod niya, wala siya magdahom nga si Ecleo nasikop human sa pipila ka tuig nga nagtagotago ug nagtuo nga pagbuot kini sa Ginuo.

Si Bacolod, nihangyo nga magpatago sa iyang address tungod sa kabalaka sa seguridad, nahinumdm kon unsa ang ilang pag-antos hangtod sa pagtapos sa kso.

Gawas sa tumang kaguol, nakahinumdom siya nga gibutang sila ubos sa police protection program hangtod sa 2005 ug daghang huwes ang ninglihay sa pagkupot sa kaso.

“Katong mga panahon nga kuan kaayo mi, depressed, ang amo gyud nga gipangita ato. At least karon medyo nawala wala kay nakuha namo ang justice though sa decision sa korte nga convicted na siya pero mas labaw na, murag na luagluag among dughan nga nakit an na sad siya after pila ka years,” matod n Nino uban sa pagpanglugmaw sa luha sa iyang mga mata.

Walo ka tuig gikan sa pagpatay ni Alona, ang lider sa Philippine Benevolent Missionaries Association (PBMA) ug kanhi Dinagat Islands congressman Ruben Ecleo Jr. nasikop sa usa ka dakbayan sa Central Luzon niadtong Hulyo 30.

Ang pagsikop kang Ecleo, ang supreme master sa PBMA, gibase sa warrant of arrest nga giisyu sa First Division sa Sandiganbayan sa iyang pagka kombikto sa kasong graft and corruption.

Si Ecleo nakombikto usab sa kasong parricide sa korte sa Sugbo niadtong 2012, 10 ka tuig human ang lawas ni Alona nakaplagan sulod sa trash bag nga gilabay sa lungsod sa Dalaguete, amihanan sa lalawigan sa Sugbo.

Lima ka buwan human nakaplagan ang lawas ni Alona niadtong Enero 2002, ang iyang mga ginikanan ug duha ka mga igsuon namatay sa pagmasaker sa ilang balay sa Barangay Subangdaku, dakbayan sa Mandaue pinaagi sa usa ka sakop sa sakop ni Ecleo.

Nahitabo kini pipila ka oras sa wala pa motahan si Ecleo sa ilang balay sa Dinagat Islands.

Ang kapulisan naglibot sa balay ni Ecleo apan gisukol sa mga armadong sakop sa PMBA. Ang engkuwentro niluntad og tulo ka oras, patay ang 16 ka mga sakop sa sekta ug usa ka police officer.

Samtang, laing namatay sa paghusay sa kaso ni Ecleo nga mao ang private prosecutor nga si Arbet Sta. Ana-Yongco, kinsa gipusil-patay sa ilang balay sa Cebu City niadtong 2004.

Ang nabiling buhi sa pamilyang Bacolod nagpasalamat sa mga pulis, mga sakop sa Integrated Bar of the Philippines (IBP)-Cebu, ug Crusade Against Violence (CAV) nga giila ni Nino, nga instrumento sa pagtabang kanila sa pagkab-ot sa hustisya batok sa iyand giingong gamhanang pamilyang Ecleo. (WBS)


Source: Sun.Star Superbalita (https://www.sunstar.com.ph/article/1865506/Superbalita-Cebu/Balita/Nio-Hustisya-nakab-ot-pagkasikop-ni-Ecleo-pagbuot-sa-Ginuo?ref=rss&format=simple&link=link)

No comments